Turner Classical Movies, kanali televiziv amerikan i cili në programacionin e tij përfshin vetëm filmat më të mirë klasikë të krijuar deri në fillim vitet 80-të, për herë të parë do të transmetojë sot në orën 21.15 një film shqiptar, një nga më të njohurit dhe më shikuarit e regjisores Xhanfise Keko dhe kinemasë shqiptare, “Tomka dhe shokët e tij”.
Pak ditë më parë u raportua se regjisori irlandez Mark Cousins në dokumentarin e titulluar “Women Make Film” (Gratë bëjnë film) ka përgjedhur regjisoret nga e gjithë bota të cilat kanë bërë filma të suksesshëm, ku ka përfshirë edhe Kekon. (KLIKO)
Përzgjedhja që ky kanal televiziv i ka bërë filmit “Tomka dhe shokët e tij” është rrjedhë logjike e udhëtimit që ka bërë filmi përgjatë gjashtë viteve të fundit që prej momentit të restaurimit të tij nga Libraria e Kongresit Amerikan në Washington në bashkëpunim me ACP, fillimisht duke u shfaqur premierë në British Film Institute dhe Lincoln Center, duke vazhduar me turin e gjatë të shfaqjes në 11 qytete në Britaninë e Madhe si pjesë e programit “Kinemaja e fëmijërisë”, dhe më pas tributet e veçanta dedikuar regjisores Xhanfise Keko nga Danish Film Institute në 2018 dhe Vienna Film Museum në 2019, duke e bërë atë autoren më të vlerësuar në historinë e kinemasë shqiptare.
Shfaqja e filmit shqiptar nga kanali televiz amerikan është një lajm shumë i mirë jo vetëm për Kekon, por dhe për vetë kinemanë shqiptare dhe kulturën tonë.
Po kush është Xhanfize Keko?
Xhanfize Keko lindi më 27 janar të viti 1928 dhe vdiq në dhjetor të vitit 2017. Ajo u lind në Gjirokastër dhe ishte regjisore e 25 filmave. Mes filmave që realizoj Keko ishte: Taulanti kërkon një motër, Beni ecën vetë, Partizani i vogël velo, Kur po xhirohej një film etj. Po ashtu, ajo ishte editore e filmave: Pas gjurmëve, Tomka dhe shokët e tij, Plagë të vjetra etj.
Në një kohë kur Ministria e Kulturës ka lënë në heshtje shumë sektorë dhe pjesë të veçanta të kulturës, bota po i promovon dhe vlerëson ato.
