Qeveria do t’i ndërtojë një mol (port jahtesh) Zamir Manes dhe rrugët brenda fshatit turistik që ka ngritur në Drimadhëz, Palasë. Ndërtimi i portit fshihet pas fjalëve “Ndërhyrje të Integruar për përmirësimin e aksesi, shërbimeve dhe rikualifikimit urban në zonën e Plazhit Palasë – Drymadhes”. Në pamje të patë duket sikur do të ndërtohet ndonjë rrugicë, por është një objekt mbi det.
Projekti i “Molit”
Por projekti teknik, Gazeta Reforma e disponon, paraqet një ndërhyrje me një hundë gjigande në det për të krijuar hapësirën e qëndrimit të skafeve dhe jahteve.
Ministrja e Infrastrukturës, Belinda Balluku dhe Fondi Shqiptar i Zhvillimit kanë bërë të mundur devijimin e parave të rrugëve për tek vilat e ngritura nga oligarku Zamir Mane. (Oligark quhen ata sipërmarrës që kanë fuqi të ndikojnë dhe t’i kthejnë në vendimet e qeverisjes në favorin e tyre, për të përfituar nga fondet publike)
Ky tender i sapo shpallur Fondi Shqiptar i Zhvillimit, e ka fondin limit prej 525 000 000 Lekë (pesëqind e njëzet e pesë milion lekë) ose 4.23 milion Euro.
Ofertat duhet të dorëzohen në Nëntor 2020 dhe punimet duhet të përfundojnë për dhjetë muaj pas lidhjes së Kontratës. Detajet e projektit, modelin e preventivit dhe specifikimet për konkurrentët janë dokumente që gjendjen në Pasaportën e këtij tenderi, që Gazeta Reforma po e publikon më poshtë.
Në projektin teknik të Bashkisë Himarë për këtë objekt paraqiten emrat e 16 arkitektëve dhe inxhinierëve që kanë punuar për anën teknike të zbatimit të këtij objekti dhe studimin arkitektonik, të porositura në një studio private.
Në këtë prezantim mungon studimi mjedisor për efekte që do të ketë ky ndërtim i cili është tërësisht mbi ujërat e kristalta të plazhit Drimadhëz.
Ndryshuan ligjet për jahtet
Këtë vit, në Kuvendin e Shqipërisë janë paraqitur nga Ministrja Balluku dy projektligje që janë miratuar, që ka në lidhje me jahtet dhe skafet. Njëri heq TVSH e naftës që përdorin këto mjete detare, pra shteti u ul 20 përqind në çmimin e blerjes me pakicë pronarëve të jahteve. Projektligji tjetër që u miratua para disa ditësh në Kuvend kishte të bënte me regjistrimin e mjeteve turistike. Ky ligj lejon që jahtet dhe skfet e huaja mund të qëndrojnë në Shqipëri për 18 muaj.
Belinda Balluku dhe Blendi Klosi që mbrojtën këtë ligj në parlament, me siguri janë nën ndikimin e biznesmenit Mane, të cilit po i dhurohet fshehurazi ky “mol” jahtesh me paratë e shtetit.
/GazetaReforma.com/
