Në 2 nëntor pritet të fillojë edhe viti i ri akademike e ndonëse situata paraqitet kaotike në shkolla, kjo nuk e ka ndaluar Ministrinë e Arsimit që të hap edhe Universitetet.
Ditën e sotme Universiteti i Tiranës ka publikuar rregulloren për studentët dhe gjithë procesin e mësimit në auditore.
Rregullorja parashikon që në hyrje të ndërtesës së çdo njësie përbërëse si dhe në mjedise të tjera të përshtatshme, do afishohen masat e parashikuara si dhe postera për masat e higjenës dhe mbrojtjen nga virusi.
Shmangia e rasteve të dyshuara
Në lidhje me studentët me shenja të virusit, thuhet se ata këshillohen të qëndrojnë në shtëpi dhe të informojnë sekretarinë mësimore përmes telefonit ose me e-mail. Sekretaria informon personin përgjegjës për çdo rast të vetëdeklaruar.
E njëjta gjë vlen edhe për personelin akademik, ndihmësakademik dhe administrativ. Struktura e burimeve njerëzore në çdo njësi përbërëse verifikon gjendjen shëndetësore të studentit apo të personelit akademik, ndihmës akademik dhe administrativ dhe ndjek ecurinë e gjendjes shëndetësore.
Ndërkohë, personat e konstatuar me temperaturë në hyrje të godinës, izolohen menjëherë nga personi përgjegjës dhe njoftohet NjVKSH si dhe telefonohet numri 127.
Vetëkarantinimi i personave me kontakt të drejtpërdrejtë me të infektuar
Në rastet kur një person rezulton i prekur me Covid-19, personat që kanë qenë në kontakt të drejtpërdrejtë me të në institucion vetëkarantinohen. Në rastet kur personi i infektuar me Covid-19 është student, atëherë i gjithë grupi me të cilin ai zhvillon mësim kalon në mësim në distancë për 14 ditë, , në varësi të situatës së tyre shëndetësore.
Prej këtej ngrihen një sërë problemesh, pasi nuk dihet se si do zhvillohet mësimi vetëm për këtë grup studentësh, teksa vlen të theksohet se kështu zgjerohet edhe zinxhiri i rasteve të reja, pasi i infektuari, apo i dyshuari, kanë kontakte edhe jashtë shkollës.
Po ashtu, në rregullore thuhet se në çdo godinë do përdoret vetëm hyrja qendrore. Rregullorja parashikon që në auditor të ruhet distanca prej të paktën 1.5 – 2 m mes studentëve. Nëse numri i studentëve është më i madh sesa hapësira e auditorit, mësimi zhvillohet duke e ndarë grupin në disa nëngrupe dhe duke e zhvilluar mësimin me disa turne, sipas një grafiku të caktuar.
Kjo do jetë padyshim një problematikë e madhe sidomos për studentët që paralelisht me shkollën, janë edhe të punësuar.
Po ashtu, studentëve u kërkohen edhe maskat, që padyshim duhet t’i blejnë vetë. Nuk lejohen qëndrimet në korridore, Kkorridoret e mjediseve ku zhvillohet veprimtaria mësimore dhe administrative pastrohen/dezinfektohen çdo dy orë.
Për ta lexuar të plotë rregulloren, kliko KËTU.
Nëse po bëhen gati skenarët për mbylljen e shkollave, pse po hapen Universitetet?!
Më herët ditën e sotme u raportua se Ministria e Arsimit, pas rritjes së rasteve të reja dhe kthimit të shkollave në vatra infeksioni po mendon mbylljen e shkollave dhe skenarët për vijimin e mësimit. (KLIKO)
Nëse do të ketë rritje të numrit të të infektuarve në shkolla, Ministria e Arsimit pritet të zbatojë skenarin numër dy, që një pjesë e klasave të bëjnë mësim miks, duke u alternuar disa klasa mësim në shkolla disa online.
Ndërsa skenari më i keq është që mësimi online të shtrihet në të gjitha shkollat e vendit, por gjithmonë kjo do të jetë në varësi të situatës së të infektuarve në këto institucione por edhe në mbarë vendin, raporton Klan Plus.
Sipas Ministrisë së Arsimit, për t’i paraprirë çdo lloj situate, është ngritur platforma akademia.al, e cila do të ofrojë mësim të unifikuar. Ndërkohë që brenda javës që vjen mbyllet trajnimi i rreth 19 mijë mësuesve për mësim online.
Mësim online? Por, si?
Ndonëse karantinimi si pasojë e shpërthimit të Covid-19 në muajin mars, kishte si zgjidhje për vijimin e procesit mësimor “mësimin online”, duket se ky i fundit ka shërbyer më shumë si një fasadë se të ketë kontribuar realisht për dije. (KLIKO)
Studentët na kanë treguar në sondazhe dhe prononcime se mësimi online tregoi se ishte një dështim spektakolar, pasi nuk është realizuar me një plan të mirëmenduar. Shumë prej tyre nuk kanë mundur t’a ndjekin, ashtu si shumë studentë të tjerë.
Në kushtet në të cilat është zhvilluar mësimi online ka qenë diskriminues dhe diferencues për ata studentë që nuk kanë pasur mjetet e nevojshme për t’a ndjekur. Madje studentët kanë pohuar se ishte një kosto shtesë bashkë me ofertat e internetit, wirless etj që duheshin paguar.
Por, pavarësisht ankesave dhe pakënaqësive ende nuk ka një plan se si do realizohet kombinimi i mësimit online me atë në auditore, si do realizohet gjithpërfshirja e studentëve dhe mbi të gjitha a do paguhet taksa e plotë edhe për këtë vit, ashtu si për vitin që po lëmë pas. (KLIKO)
Po me transportin publik ç’po ndodh tani që studentët u rikthyen?
Problem i rrezikshëm mbetet edhe transporti publik, i cili përdoret nga pjesa më e madhe e studentëve. Këtu problem mbetet jo vetëm transporti urban, por edhe ai ndërqytetas, pasi siç e dimë shumë studentë zhvendosen nga qytetet e tyre për të ndjekur studimet.
Duke u ndalur te tranporti urban në kryeqytet (pjesa më e madhe e pjesëmarrësve në sondazh studiojnë në Tiranë), studentët thonë se Bashkia nuk i ka shtuar linjat dhe kjo çon automatikisht në tejmbushjen e autobusëve, që përkthehet më pas në rrezik infektimi.
Mësim online, tarifa offline
Një tjetër problematikë që ministrja e Arsimit nuk e di është fakti se studentët po paguajnë tarifën, ndonëse fizikisht këtë vit e kanë frekuentuar shkollën jo më shumë se dy muaj.
Mësimi në universitete nisi javën e dytë të tetorit të 2019, por u ndërpre për disa kohë në fund të nëntorit pas tërmetit fatal. Kjo ndërprerje u pasua më pas nga festat e fundvitit, për tu finalizuar në mars pas mbërritjes së Covid-19 edhe në vendin tonë. (KLIKO)
Mirëpo, në vend që të bënte diçka lidhur me këtë problematikë, në një kohë kur familljet shqiptare janë të rrënuara ekonomikisht nga pandemia, ministrja FIRMOS.
