Një histori tepër e veçantë u rrëfye sot në emisionin “Historia ime” në Tv Klan, ku një nëne 33-vjeçare e cila ka lindur në një fshat të Fierit ka kërkuar ndihmë pasi e ka të vështirë të përballojë jetesën në kushte të vështira ekonomike.
Ajo ishte vetëm 15 vjeç kur u lidh me djalin i cili më vonë do të bëhej bashkëshorti i saj. Në vitin 2008 u martua, pa dëshirën dhe mbështetjen e familjes së saj, dhe që kur e pa për herë të parë në moshën 14 vjeçare u dashurua.
Për 4-5 vite me radhë, ata nuk janë takuar dhe nuk kanë folur asnjëherë më njeri-tjetrin, por ishin dashuruar vetëm duke u parë, pa konsumuar në asnjë moment lidhjen apo dashurinë e tyre.
Nga martesa e tyre sollën në jetë dy fëmijë, dy djem, të cilët sot janë përkatësisht 12 dhe 9 vjeç, dhe të dy janë nxënës në ciklin 9-vjeçar.
Bashkëshorti asnjëherë nuk ka qenë i përgjegjshëm si duhet ndaj saj dhe fëmijëve të tij. Ai luante bixhoz, punonte vetëm në të zezë kur mundej dhe nuk kishte një punë të qëndrueshme. Për shkak të sjelljeve të tij problematike ka qenë dhe në burg.
Në vitin 2012, 33-vjeçarja nuk duroi më dhe vendosi të divorcohej prej tij dhe pse ishte 8 muajshe shtatzënë me djalin e tyre të dytë. Por ajo e ka pasur gjithmonë të vështirë t’ia dalë e vetme, pasi ende sot nuk i ka marrëdhëniet e mira me familjarët e saj dhe nuk ka asnjë mbështetje.
Biseda në studio
33-vjeçarja: Jam dashuruar që 14 vjeç.
Mirela Milori: Shumë e vogël ke qenë për t’u dashuruar.
33-vjeçarja: U njohëm në një dasmë dhe nuk hoqëm dorë. Kur vajta 19 vjeç u martova.
Mirela Milori: Si dashuron një fëmijë 14 vjeç?
33-vjeçarja: Nuk e di, nuk është se dola, e takova. Deri në 19 vjeç unë nuk pranoja njeri tjetër dhe të gjithë më pyesnin pse nuk do.
Mirela Milori: A takoheshit, a u konsumua si dashuri gjatë këtyre viteve, domethënë u takuat, u deshët?
33-vjeçarja: Jo asnjëherë, ishte dashuri platonike, kur vajta 19 vjeç erdhën më kërkuan tek shtëpia.
Mirela Milori: Si u morët vesh me letra?
33-vjeçarja: Me asgjë, vetëm me mendime. Erdhi vjehrri më kërkoi dorën, më tha djali im ka ikur nga mendja të do dhe atëherë unë kam vajtur. Familja ime nuk donin sepse ata ishin të varfër. Për 4-5 vite vinte në fshat dhe vetëm e shikoja asgjë tjetër.
Sot nëna 33-vjeçare nuk punon, sepse nuk mundet për shkak të një problemi shëndetësor që ka në shtyllën kurrizore dhe që i ka dëmtuar rëndë njërën këmbë. Ajo jeton me qera, e përballon me shumë vështirësi jetesën dhe kërkon ndihmë.
Gjendja e saj psikologjike është e rënduar, madje ka pasur momente që ka dashur të vrasë dhe veten. Ajo kërkon një Kemp dhe një asistencë për fëmijët e saj, për të cilët babai i tyre nuk përgjigjet ndaj detyrimeve që ka.
Ka trokitur shpesh në dyert e Shërbimit Social, madje për herë të fundit përpara pak muajash, ia plotësojnë dokumentat dhe nuk merr më tej asnjë përgjigje.
33-vjeçarja: Unë nuk kam bukë për t’i dhënë fëmijëve. Në punë nuk më marrin se kam një problem në shtyllën kurizore. Kur jam ndarë, kam bërë edhe letrat për shtëpi në Bashkinë e Fierit.
Mirela Milori: E ke statusin e të papunës dhe të pastrehës?
33-vjeçarja: Po po i kam të gjitha.
Mirela Milori: A ke marrë gjë për këtë status?
33-vjeçarja: Jo asnjë gjë.
/tvklan.al
