Dy kushërinj janë vënë në sitën e sektorit për Hetimin e Krimeve të Rënda pasi shantazhonin një grua përmes disa videove personale dhe i kërkonin asaj 150 mijë lekë të vjetër në këmbim të mos publikimit online të pamjeve.
Policia ka vënë në pranga 18-vjeçarin Afrim Kurtin ndërsa është shpallur në kërkim kushëriri i tij Defrim Kurti, i cili shantazhonte ish-të dashurën, me qëllim përfitim financiar.
Ka qenë gruaja ajo e cila ka denoncuar rastin në polici dhe ka futur në kurth ish-të dashurin, duke i lënë takim për t’i dhënë paratë që kërkonte. Në momentin e dhënies së parave ka ardhur për të marrë paratë kushëriri i tij dhe më pas ka ndërhyrë policia duke e arrestuar në flagrancë.
Sipas njoftimit, është shpallur në kërkim Defrim Kurti, për shantazhim ndaj ish të dashurës, e cila është një grua e divorcuar dhe me dy fëmijë.
Njoftimi i policisë:
Nga Sektori për Hetimin e Krimeve të Rënda ndaj Jetës dhe Pronës u bë arrestimi në flagrancë i shtetasit me iniciale A. K., 18 vjeç, si dhe u referuan materialet në Prokurorinë pranë Gjykatës së Shkallës Parë Tiranë, për shtetasin në kërkim me iniciale D. K, 30 vjeç, pasi në bashkëpunim kanë shtrënguar me anë të kanosjes dhe dhunës për dhënie pasurie, një shtetase, me qëllim t’i përvetësonin shumën prej 15.000 lekësh të reja, për mospublikimin e fotove të saja në rrjetet sociale.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
