Sportisja Klodiana Shala tregoi sot në emisionin “Ditë e Re” se është propozuar nga Partia Demokratike për kandidate për deputete në të gjitha qytetet.
Gjatë bisedës me moderatorët Ariola Shehu dhe Arjon Muça, Klodiana tha se duhet të kesh vjedhur disa gjëra që të mund të bëhesh deputete. Ajo madje foli edhe për korrupsionin dhe vilat në Dhërmi apo në Gjirin e Lalëzit të deputetëve.
“Nuk kam për të ndryshuar unë. Kam qenë dhe jam me PD, nuk e kam bërë për të përfituar nga PD. 5 fushata që i kam bërë, i kam bërë me pasion. Para pak kohësh janë bërë propozime nëpër Shqipëri për kandidatët për deputetë. Unë jam propozuar në të gjitha qytetet, pasi dihet se jam e dashur me popullin, besoj me aq sa më kanë thënë. Unë njihem si sportistet ndoshta më të dashura të ekranit. Më thonë a do të bëhesh deputete? Kur ma thanë në fillim, thashë nuk kam vjedhur deri tani, nuk kam çfarë fsheh. Se duhet të kesh vjedhur disa gjëra. Nëse duam të themi realitetin, e dimë shumë mirë. Ku do e shohim korrupsionin? Shikoni vilat te Gjiri i Lalzit apo në Dhërmi, deputetët i kanë vilat. Ka shumë pak deputetë që e meritojnë, dhe shpresoj se këtë radhë të jenë deputetët që e meritojnë.”
Por a do të kandidojë në zgjedhjet e vitit 2021? Shala tha se nuk e kishte me qejf diçka të tillë, por nëse do kandidonte, do preferonte zonën nr. 8 në Tiranë, pasi tha me batutë se është fqinje me kreun e PD, Lulzim Basha.
“Kam shumë miqësi në politikë dhe shumica e tyre janë fallco. Shikon shumicën që dalin në televizor sikur vuajnë shumë për hallet e popullit, por mbrapa kur ulesh për drekëe për darke me to, më habisnin. Prandaj kam filluar të qëndroj larg këtyre miqësive. Me fallcot nuk mbaj më shoqëri. Shpresoj që të vlerësohen njerëzit e duhur dhe që e meritojnë. Nuk e di nëse do kandidioj, por nuk e kam me qejf, sepse nuk kemi arritur në atë lloj niveli si Suedia që gjithsecili e do punën e vet. Në Itali çohet populli çdo 6 muaj kundra qeverisë së tyre, që të mos mësohen këta politikanë 8 deri në 12 vite në pushtet. Unë me origjinë jam kosovare por kam lindur në Tiranë, ndoshta këtu do kandidoja. Jam komshie me Lulzim Bashën”.
