Një 25-vjeçar ka dhunuar dhe torturuar ish-partneren e tij pas ndarjes, në kryeqytet.
Ka qenë 29-vjeçarja ajo e cila pas njohjes virtuale u lidh me djalin katër vjet më të vogël se ajo, pasi ky e kishte gënjyer për moshën.
Vajza vendosi ta mbyllë historinë e dashurisë me E. K., por ky i fundit nuk e ka pritur mirë dhe e ka dhunuar atë, e ka marrë peng duke i kërkuar që të ndërronte mendim. Pasi e mbajti peng disa orë, tentoi ta hidhte nga dritarja, dhe lidhur me kabëll, raporton gazeta Si.
25-vjeçari tentoi të frikësojë edhe të ëmën dhe të vëllain e saj, këtë të fundit duke tentuar ta përplasë me automjetin e tij. Aktualisht E. K., është arrestuar dhe ka edhe dëshmitarë që pohojnë se i shkatërroi vëllait të ish-it makinën, pasi dështoi ta përplaste me makinë.
Dëshmia e vajzës dhe nënës së saj!
Ka qenë nëna e vajzës që shkoi në polici dhe denoncoi dhunën duke treguar shenjat në fytyrën e të bijës, hundën e dëmtuar dhe sytë e mbyllur nga keqtrajtimi.
“Kur ime bijë u kthye nga Turqia ku shkoi me të dashurin e saj, sapo hyri në shtëpi ishte e mufatur, me fytyrë të ënjtur dhe sytë e mbyllur nga të nxirat. U tmerrova, por më tha, – jo mami, nuk do shkojmë në polici, nuk do ta telefonojmë policinë. Reagoi dhunshëm sepse e lashë”.
I vëllai me inicialet L. A tregon se ditët e fundit kishte parë në lagje një tip të çuditshëm që shfaqej i nervozuar.
“E pashë që një ditë ndaloi dhe bëri gjeste të turpshme. E identifikova. Ai qarkullonte me një audi A6. Të nesërmen me këtë makinë, kur po qëndroja në rrugën Bill Klinton kjo makinë mu afrua me shpejtësi dhe për pak më shtypi. Ai u afrua qëllimisht pranë meje për të më vrarë. Më pas ai u afrua me shpejtësi drejt mjetit tim që e kisha të mbyllur dhe e goditi. Automjeti im Ford Focus ka dalë jashtë kontrollit, nuk ndizet më”, shprehet vëllai i vajzës.
Më shokuese akoma ishte dëshmia e të resë që ka pranuar se gjithçka nisi nga një ftesë në Facebook. I riu e rriti moshën duke gënjyer, por tha edhe të vërteta sikurse i tregoi vajzës se ishte me arsim të lartë dhe në pritje të një pune të mirë.
“U njoha në fillim të vitit. Në muajin maj ne dolëm për herë të parë. Nga njohje shoqërore krijuam më tej lidhje intime. Ai nuk ma kishte treguar moshën e vërtetë, dhe që ishte më i vogël se unë. Përkundrazi pretendonte që ishte më i madh se unë”.
Sipas burimeve të gazetës Si e reja e zbuloi këtë fakt kur çifti u largua për pushimet e verës në Turqi.
“Gjatë kësaj kohe mësova shumë gjëra rreth tij dhe gënjeshtrave, ndaj e njoftova kur të ktheheshim në Shqipëri lidhja merrte fund”. “Në Rinas kishim konflikt për motiv krejt banal. Kur po ktheheshim rrugës ai filloi të më godasë me grushte në fytyrë, më lidhi me kabullin e karikuesit të telefonit në qafë. Pastaj më rrëmbeu telefonin që mos të njoftoja familjen”, jep detaje A. A, e cila kujton se gjatë gjithë rrugës është dhunuar në mënyrë kafshërore.
/gazeta Si
