Një ditë pas hapjes së shkollave, 10 mësues në bashkinë e Kolonjës janë izoluar pasi dyshohet të jenë të infektuar me koronavirus.
Mediat raportojnë se në momentin që këta mësues kanë shfaqur shenjat e para, janë vetizoluar në banesat e tyre deri në përgjigjen e rezultatit të tamponëve. Lajmi vjen një ditë pasi u raportua se në bashkinë e Korçës kanë rezultuar pozitivë 2 mësues, ndërsa janë karantinuar 4 të tjerë.
Hapja e shkollave nisi dje me një mungesë organizimi dhe kujdesi edhe nga ana e prindërve të nxënësve, fotot shqetësuese të të cilëve na treguan se koha kur virusi të përhapet në familjet tona, të prekë prindërit e gjyshërit tanë, nuk është e largët.
Ministria e Arsimit e justifikoi vendimin për hapjen e shkollave me arsyetimin se kështu duan mësues, prindër, e fëmijë, por nuk pritet të jetë e largët koha kur shumë shkolla të kthehen në vatra virusi.
E gjendur përballë kësaj situate, ministrja e Shëndetësisë dhe Mbrojtjes Sociale Ogerta Manastirliu, deklaroi se prioritet për hetimin epidemiologjik do të jenë edhe nxënësit me mësuesit, bashkë me infermierët dhe mjekët.
“Kemi prioritet testimin e nxënësve dhe mësuesve ashtu si mjekët dhe infermierët, pra janë grupe risku dhe janë në prioritetin e testimeve tona. Koordinatorët e çdo shkolle sinjalizojnë strukturat shëndetësore të cilat janë në gatishmëri. Nëse zbatojmë rregulla kemi një risk të moderuar. Përgjegjësia e institucioneve arsimore, është të zbatojnë udhëzuesi, një koordinator do jetë në çdo shkollë dhe do të sinjalizojnë strukturat shëndetësore për çdo rast, ISHSH do të jetë në terren ku verifikon nëse masat zbatohen masat anti-COVID”, tha Manastirliu.
Sipas ministres, janë marrë të gjitha masat për planin e vjeshtë-dimrit për forcimin e kapaciteteve në spitale duke u përgatitur për çdo skenar.
“Kemi marr masat për forcimin e kapaciteteve në spitale për t’u përgatitur nëse do të kemi raste të shtuara. Kemi rritur me 30% grupet e terrenit ndërkohë që kemi vijuar edhe me forcimin e njësive të terapisë intensive“, tha Manastirliu.
Shpresojmë që për mësuesit dhe nxënësit të ketë një vëmendje më të madhe sesa thjesht plotësimi i formularit absurd që iu kërkohet, të deklarojnë “nëse janë të prekur me COVID, ata vetë ose familjarë”.
Shqiptarët po paguajnë më shumë se kushdo në rajon për kryerjen e analizave serologjike dhe tamponit, në një kohë që duhet të ishin falas sipas ligjit, veçanërisht në këtë periudhë kur hapja e shkollave pritet të rritë edhe numrin e të infektuarve.
Deri më tani ministria u ka lënë përgjegjësinë nxënësve që të raportojnë të parët sapo të hasin me një rast të infektuar nga pandemia. Pra një i mitur, ndoshta dhe në klasë të parë, do të mbajë përgjegjësi nëse ka pasur kontakte me të infektuar nga pandemia.
