Një 16-vjeçar ka denoncuar në policinë e Beratit, një të moshuar pasi prej disa muajsh ai ishte ngacmuar seksualisht nga 66-vjeçari që rezulton të jetë komshiu i tij.
Në dëshminë e dhënë para efektivëve të policisë, ai ka treguar se historia vijon prej muajsh por ka pasur frikë ndaj edhe nuk ka denoncuar. Kur i moshuari kërkoi më shumë sesa prekje në zonat intime, i riu iu kundërvu dhe e qëlloi me gur, duke shkuar më pas në polici.
“Për muaj me radhë komshiu im më prekte me duar në zonat intime dhe më detyronte me forcë që dhe unë ta prekja. Kjo histori vazhdon prej muajsh, por unë kam pasur frikë prej tij dhe nuk i kam treguar askujt. Sot kur më mori duke më kërcënuar pas banesës së tij ai tentoi më shumë dhe unë nga frika dhe për të shpëtuar prej tij mora një gur,e qëllova në shpatull dhe u largova me vrap”, është shprehur i riu.
16-vjeçari iu nënshtrua më pas edhe një vizite të specializuar mjekësore, nga e cila rezultoi se kishte shenja të dukshme të ngacmimit seksual. Pas denoncimit të minorenit dhe raportit të mjekëve, policia ka prangosur në banesën e tij 66-vjeçarin, që jeton i vetëm rreth 200 metër larg banesës së denoncuesit.
Report tv shkruan se, gjatë marrjes në pyetje 66-vjeçari ka deklaruar se mes tij dhe 16-vjeçarit kishte një lidhje intime që vazhdonte prej muajsh,me pëlqimin e të dyve.
I moshuari akuzohet për “ngacmim seksual”,parashikuar nga Neni 108/a i Kodit Penal.
