Që viti shkollor dhe akademik 2019-2020 është shoqëruar me mangësi të pafundme, kjo është pak por e sigurtë.
Ndonëse karantinimi si pasojë e shpërthimit të Covid-19 në muajin mars, kishte si zgjidhje për vijimin e procesit mësimor “mësimin online”, duket se ky i fundit ka shërbyer më shumë si një fasadë se të ketë kontribuar realisht për dije.
Përse nuk po zhvillohen leksionet e premtuara?
Në një sondazh të kryer nga “iconstyle.al” studentët treguan se mësimi online ka shkaktuar tek ta pakënaqësi dhe boshllëqe. Aso kohe atyre iu është thënë nga pedagogët dhe drejtuesit e fakulteteve se çdo paqartësi dhe mangësi do zgjidhet në shtator, me rikthimin e tyre në auditore.
Mirëpo, tashmë shtatori ka ardhur dhe si duket shpesh “fjalët i merr era”.
Kjo pasi pjesa më e madhe e fakulteteve nuk po zhvillojnë leksionet që kanë premtuar disa muaj më parë, por studentët janë testuar direkt.
Ndonëse, shumë prej tyre nuk kanë patur mundësi dhe akses në mësimin online, provimet e semestrit të dytë të këtij viti akademik po zhvillohen si në kushte normale.
Madje, disa studentë na kanë treguar se po testohen edhe në lëndët, që nuk i kanë zhvilluar gjatë periudhës mars-qershor.
Ajo që duket prej së largu është se mësimi online ka dështuar, por nuk dihen ende arsyet se përse shumë lëndë teorike që mund të zhvilloheshin mjaft mirë nëpërmjet “Google Meet” janë shtyrë për në shtator dhe tani askush nuk kujtohet për to.
Për arsye ende të paditur, studentët nuk po marrin njohuritë e duhura ndonëse po rrezikojnë jetën e tyre dhe të afërmve me rikthimin në shkollë, në një kohë kur nuk po marrin mësime shtesë.
Problemi më i madh nuk është thjesht te vlerësimi që do bëhet në këtë rast, por të formimi i përgjithshëm i tyre.
Masat anti-Covid nuk po respektohen
Sikundër ishte menduar edhe më herët, studentët thonë se masat anti-Covid nuk po respektohen.
Nga 4,200 studentë që kanë marrë pjesë në sondazh, 67% e tyre janë përgjigjur se rregullat e pandemisë nuk po respektohen dhe se kushtet në universitete nuk ua mundësojnë diçka të tillë.
Madje shumë shprehen se nuk kanë parë asnjëherë të bëhet desinfektimi i sallave, që supozohet të kryhet menjëherë sapo një orë leksioni, apo provimi përfundon.
Duke filluar nga sallat e vogla dhe numri i madh i studentëve tek procedurat e vështira dhe mosndërgjegjësimi, rregullat e pandemisë në universitete duket se janë harruar dhe nuk do ishte çudi nëse në vijim do ktheheshin në vatra të reja infeksioni.
Po me transportin publik ç’po ndodh tani që studentët u rikthyen?
Problem i rrezikshëm mbetet edhe transporti publik, i cili përdoret nga pjesa më e madhe e studentëve. Këtu problem mbetet jo vetëm transporti urban, por edhe ai ndërqytetas, pasi siç e dimë shumë studentë zhvendosen nga qytetet e tyre për të ndjekur studimet.
Duke u ndalur te tranporti urban në kryeqytet (pjesa më e madhe e pjesëmarrësve në sondazh studiojnë në Tiranë), studentët thonë se Bashkia nuk i ka shtuar linjat dhe kjo çon automatikisht në tejmbushjen e autobusëve, që përkthehet më pas në rrezik infektimi.
Tarifa për 2 muaj shkollë= Tarifa për 9 muaj shkollë
Një tjetër pakënaqësi që kanë studentët është fakti se ata po paguajnë tarifën, ndonëse fizikisht këtë vit e kanë frekuentuar shkollën jo më shumë se dy muaj.
Mësimi në universitete nisi javën e dytë të tetorit të 2019, por u ndërpre për disa kohë në fund të nëntorit pas tërmetit fatal. Kjo ndërprerje u pasua më pas nga festat e fundvitit, për tu finalizuar në mars pas mbërritjes së Covid-19 edhe në vendin tonë.
Kështu, në një kohë kur kriza ekonomike që erdhi si pasojë e asaj shëndetësore, dhe kur ambientet e universiteteve nuk janë shfrytëzuar, përse duhet që tarifa të paguhet aq sa paguhet në kushte normale, kur studentët frekuentojnë auditoret nga mesi i tetorit deri në mes të korrikut?
Nëse për dështimin e mësimit online fajsojmë kushtet e pandemisë, kë do fajësojmë tani që studentët u rikthyen në auditore?
