73-vjeçarja Mentije Dumani e cila jetonte ne kampin famëkeq të Al Hawl në Siri ka ndërruar jetë.
Gjyshja e Eva dhe Endri Dumanit u shua pasditen e djeshme në kampin e Sirisë, nga ku kishte bërë apel që të kthehej në vendin e saj.
73-vjeçarja kishte bërë kërkesë për autoritetet shqiptare që ta ndihmonin të kthehej e të vdiste në vendin e saj, por dëshira nuk iu realizua.
“Më ktheni të vdes në vendin tim”- shprehej ajo në videon e publikuar nga A2news.
Referuar edhe një regjistri te mbajtur nga vetë gratë e atij kampi, në këtë kamp ndodhen rreth 80 shqiptare nga Shqipëria, Kosova dhe Maqedonia. Më shumë se gjysma e tyre janë fëmijë.
Situata vijon të mbetet shumë shqetësuese në këtë kamp, raporton The Guardian. Të paktën 4 gra dhe 10 fëmijë australianë u rrëmbyen nga al-Hawl në veri-lindje të Sirisë, u vunë në pranga dhe u dëbuan me një furgon të bardhë gjatë mbrëmjes së së shtunës.
Zëvendës shefi ekzekutiv i organizatës Save the Children, Mat Tinkler, tha se ai ishte thellësisht i shqetësuar për mirëqenien e tyre.
“Kishte shumë ulërima dhe britma. Fëmijët po qanin… Ishte shumë traumatike mënyra se si u morën ata. Ata me sa duket u vunë në pranga”, thonë dëshmitarët.
Sot që flasim ka mijëra fëmijë që janë bllokuar në këtë kamp, në pamundësi për t’u larguar edhe pas përkeqësimit të situatës me pandeminë e koronavirusit.
