Vrasja e 23-vjeçares Eglantina Buci në vitin 2012 nga i vëllai por me urdhër të babait të saj, ka tronditur opinionin publik.
Ndërkohë që grupi hetimor falë edhe një dëshmitari okular, ka zbardhur krimin e 8 viteve më parë dhe ku gjykata vendosi dje masën e burgut pa afat për Faik dhe Shkëlzen Bucit, ka thyer heshtjen edhe njerka e Eglantina Bucit, Liria.
E mbyllur në shtëpinë dykatëshe në zonën e Alliasit, ku jetonte prej 7 vitesh, Lirie Buci ka treguar se për shkak të kësaj ngjarje të rëndë dhe të pompuar edhe nga mediat, shëndeti i saj mendor është i rënduar. Ajo shprehet se ngjarja e ndodhur është e rëndë, por burri dhe djali i saj, janë të pafajshëm në këtë situatë.
“Nuk kam asgjë për të thënë momentalisht, jam e sëmurë me depresion, po të duash të jap kartelën. Me lini të qetë unë do shkoj te jetoj tek vëllezërit e mi s’keni pune në shtëpinë time. Ngjarja është e rëndë, djalin dhe burrin i kam të pastër”, është shprehur njerka e Eglantina Bucit.
Liria ndërkohë është gruaja e dytë e Faik Bucit, pas ndarjes së këtij të fundit nga Nafija në vitin 1993, vit i cili ka shënuar edhe pikën e kthesës në këtë familje, ku asgjë nuk ka qenë si më parë. Që prej ndarjes nga Faiku, Nafija nuk i ka parë më fëmijët e saj, dy vajzat e dy djemtë, ndërkohë që dramat në këtë familje nuk kanë pasur të sosur.
Një prej djemve të Bucit vdiq nga leucemia, ndërkohë që tjetri, Shkëlzeni së bashku me babanë vrau motrën dhe e groposi në Malin me Gropa. Sëmundja e vëllait ka qenë një argument i përdorur nga Shkëlzeni pse mori përsipër të bëhej vrasës me pagesë pasi donte të siguronte paratë për kurimin e të tij.
Gjyqtari Lazer Sallaku pak ditë më parë i la në burg Faik dhe Shkëlzen Bucin. Uniformat blu e kanë sjellur nga burgu me forcë në Gjykatë Shkëlzen Bucin, pasi ky i fundit ka refuzuar të marrë pjesë duke qenë se nuk e ka pranuar ngjarjen. Ai është shprehur se nuk ka dijeni për fatin e motrës së tij, ndërsa babai i Eglantinës, Faik Buci, është shfaqur para kamerave në gjykatë duke qeshur në disa momente.
Ndërkohë babë e bir e kanë mohuar që janë përfshirë në krim ndaj vajzës dhe motrës së tyre.
Faik Buci ka dëshmuar përpara policisë versionin se vajza e tij është gjallë dhe se punon si punonjëse seksi në Turqi, pasi ishte rrëmbyer këtu nga një grup i rrezikshëm kriminal.
Dinamika e ngjarjes
Vrasja makabre u zbardh pas 8 viteve ku një pjesë e skeletit u gjet i groposur te Mali me Gropa në 4 shtator duke risjellë në vëmendje një nga ngjarjet më makabre të ndodhur në vend. Sipas dinamikës së ngjarjes që prej fillimit, mësohet se Shkëlzeni ka thirrur motrën e tij për kafe, teksa ishte i shoqëruar në shokun e tij.
Në momentin që nuk po shkonin për kafe, por rrugës për te Mali me Gropa, motra, Eglantina e ka kuptuar se diçka nuk po shkonte.
Aty Shkëlzeni ka nxjerrë pistoletën dhe e ka qëlluar me një plumb në nofullën e majtë duke e lënë të vdekur në vend. E gjithë skena është parë nga shoku, i cili ka ndërhyrë duke i thënë “më vrit dhe mua”, por që Shkëlzeni nuk e ka bërë.
Ka qenë dëshmia e këtij, që ka shërbyer si indicie më pas për zbardhjen e këtij krimi, edhe pse 8 vite më pas. Nisur nga kjo, shoku i Shkëlzen Bucit ka marrë statusin e dëshmitarit të mbrojtur.
/Gazetareforma.com
