Një vit më parë në një intervistë në “Pop Culture”, kryebashkiaku Erion Veliaj tha se “çunat shqiptarë janë zdromsa”, gjë e cila në momentin kur u publikua intervista nuk tërhoqi vëmendje. Por verën e 2020-ës fjalët e Veliajt u bënë virale në rrjetet sociale dhe pati shumë reagime kundër tij, nga çunat por jo vetëm. Aq shumë sa kundërshtarët e tij politikë nisën që nga “Lali Eri” ta thërrasin “Lali Zdromsi”
Ndërkohë para pak ditësh kryeministri Edi Rama dhe kryebashkiaku i Tiranës Erion Veliaj kanë qenë në Petrelë për inspektimin e një shtëpie të rindërtuar pasi u prish nga tërmeti i 26 nëntorit të vitit të kaluar.
Gjatë vizitës në shtëpi, Rama dhe Veliaj bashkëbisedojnë me familjarët dhe Veliaj i drejtohet me termin “princeshë” vajzës së vogël në familje, ku i menjëhershëm ishte reagimi i Ramës duke i thënë Veliaj se mos të merret më me terma bukurie, pasi herën e fundit që tha se çunat janë zdrromsa, u kryezua nga publiku dhe media:
Rama: Mos hy me këto i bukur e i shëmtuar se na more në qafë. Me atë që the se çunat janë zdromsa, tani të janë qepur të gjithë ty si zdroms, mos i hy më këtij muhabet.
Veliaj: Po pse nuk janë gocat më të ftillume?
Rama: Po kjo është tjetër gjë, çunat janë të mirë, gocat janë më të mira. Po jo zdromsa… Ti s’ke faj se unë e di për ç’a e ke ti. E di për ç’a e ke, s’na u ndanë zdromsat po nuk janë të gjithë si ata.”
Ndërsa Veliaj i ftuar ditën e sotme te emisioni “Rudina” ndryshoi versionin e parë në të cilin i quajti djemtë shqiptarë zdromsa.
“Djemtë shqiptarë ngaqë llastohen shumë kur janë të vegjël, bëhen shumë më të pazotë kur rriten. Shifini kafet e Tiranës në mëngjes, janë të mbushur plot me çuna. Varen me një karrige dhe ti thua me vete, më fal, ku u lodh që tani kur sapo është zgjuar nga gjumi,” tha Veliaj asokohe.
Ndërsa sot gjërat kanë ndryshuar për kryebashkiakun Veliaj, i cili e lidhi fjalën zdroms me bashkëshoreten e tij, duke thënë se ajo e quan ‘zdroms’ sa herë që nuk bën ndonjë rregullim në shtëpi.
“Unë jam shumë i përgjegjshëm. Vërtet bëj humor dhe them ne çunat jemi zdromsa, e di çfarë domethënë zdromsa? Se shumë njerëz ofendohen dhe them pse ofendohesh për diçka që nuk e kupton? Ofendohen se janë i një grupimi politik dhe po e thashë unë, është gjë e keqe. Kur ishim të vegjël, mosha jonë, nga varfëria ne luanim me peta, me cingla, me pulla, këto lojëra kala dibrançe dhe me kopaca. Dhe kur ti shkëmbeje, si pulla, kishte një lloj tregu informal të çunave që shkëmbeni në këtë lojën me kopaca. Ti mund ta shikoje me sy që ishte i drejtë, por mënyra si ‘zyrtarisht’ testohej nëpër lagje, sa i drejt ishte një kopac, ishte kur e gjuaje me një shënjestër. Nëse kishte një trajektore të drejtë ishte i vërtetë dhe ia vlente të shkëmbej. Por nëse fillonte drejtë dhe devijonte quhej zdroms. Gjuajtje ishte drejtë, qëllimi ishte i mirë, por devijonte rrugës. Unë e vuaj në shtëpi këtë, se nëse prishet një gjë në shtëpi, bojleri, digjet një llapmë, duhet vendosur një kornizë, unë gjej gjithmonë justifikime pse s’bëhet, ja se erdha vonë, ja se ika herët. Dhe Ajola thotë: “Ti qofsh , të rregullosh gjithë Tiranën dhe mos të prekësh gjë me dorë në shtëpinë tënde, ju jeni tamam zdromsa”.
