Kryeministri Edi Rama mblodhi sot bashkë me ministren e Arsimit, Besa Shahini, mësuesit që kanë qenë pjesë e kanalit RTSH Shkolla, ku kanë regjistruar leksionet gjatë periudhës së karantinës.
Gjatë fjalës së tij, kreu i qeverisë tha se me hapjen e shkollave do të rritet në mënyrë të pashmangshme transmetimi i virusit, duke qenë se fëmijët mund të jenë mbartës së koronavorusit.
Por sërish ndonëse hapja e shkollave parashikon një transmetim më të padh të virusit, rritja e infektimeve për Ramën, nuk krahasohet me mbajtjen mbyllur të shkollave që ka një kosto të madhe psikologjike sipas tij.
“E dimë mirë që me hapjen e shkollave rritet në mënyrë të konsiderueshme mundësia e transmetimit dhe është një sfidë më vete. Por duke vlerësuar këtë vendim dhe duke parë edhe çfarë kanë bërë të tjerët opsioni i mbylljes së shkollave ishte opsion më i keq dhe patjetër që do të shkaktonte një kosto tjetër, sidomos psikologjike për fëmijët me pasoja që ne nuk i llogarisim dot deri në fund, por që të gjitha vendet i kanë marrë në konsideratë dhe i kanë cilësuar si të papranueshme në raport me rrezikun që ka në vetvete hapja e shkollave”, u shpreh kryeministri.
Më tej, Rama tha se do të ketë një rritje të re pagash për mësuesit shumë shpejt, me buxhetin e ri.
“Do të bëjmë një rritje të re pagash edhe për mësuesit, ashtu si për mjekët, dhe kjo do të bëhet shumë shpejt, besoj me buxhetin e ri. Kjo besoj se është shumë e merituar, dhe ne duhet të bëjmë më shumë sesa për tërësinë”, tha Rama.
Sa i përket kanalit RTSH Shkolla, Rama tha se është një vlerë e madhe për ata fëmijë që duan të verifikojnë njohuritë e marra, si dhe për fëmijët jashtë Shqipërie që duan të mësojnë:
“Për t’u kthyer te kanali RTSH shkolla mendoj se ka vlerë të madhe jo thjesht prej kësaj situate, që patjetër që do mbarojë, por ka një vlerë të madhe në dy aspekte të tjera. Njëri aspekt është mundësia që i jepet çdo nxënësi kudo ku ndodhet që të bëjë një verifikim të dyfishtë të mësimit që ka marrë dhe ta dëgjoj, ta ndjekë edhe me një mësuese që nuk e njeh, që nuk e ka në klasë të vet, një nga më të mirat në Shqipëri dhe të plotësojë bindjen e vet për atë lëndë. Nga ana tjetër kjo patjetër që do të sfidojë pozitivisht mësuesit e tjerë të cilët në shkollat e vendit japin lëndët që jepni ju dhe që do të kenë parasysh faktin se të njëjtin mësim që ato po japin do të mund ta shohin në versionin e një mësuese që është mësuese e kalibrit më të lartë që ne kemi. Kjo do të shtojë një mundësi deri dje jo të madhe që sistemi është përpjekur ta kompesojë përmes trajnimeve, aktualizimit të metodave të mësimdhënies, sepse dhe vetë mësuesit e tjerë me siguri që do shtyhen të shohin se si ju jepni mësim’.
Për kryeministrin, sistemi do të fillojë të adaptohet duke ndarë mësimin e lëndëve të caktuara në televizion dhe aktivitete të tjera në shkollë.
“Ka dhe një drejtim tjetër që me këtë kanal lehtësojmë barrën e fëmijëve dhe prindërve në zona më të thella, ku për një mijë e një arsye është trashëguar sistemi i klasave kolektive që ne po i reduktojmë vijëmisht deri në mbyllje dhe kështu vetë sistemi do të fillojë të adaptohet duke ndarë mësimin e lëndëve të caktuara në televizion dhe aktivitete të tjera në shkollë. Besoj që asnjëherë ekrani i kompjuterit apo i celularit nuk e zëvendëson dot marrëdhënien e mësimdhënies dhe mësimnxënies në realitetin e prekshëm”, u shpreh Rama.
/Iconstyle.al
