Elona, motra e Eglantina Bucit, ka dhënë dëshminë e saj, si një nga personat e fundit që ka kontaktuar me të ndjerën, që u ekzektua nga i vëllai Shkëlzeni dhe i ati 8 vite më parë në Malin me Gropa.
Ajo tha se vëllai Shkëlzeni nuk ka bërë asgjë në kokën e tij dhe për gjithçka nxitej nga 66-vjeçari, madje edhe për atentatin ndaj aktorit Mishel Prela. E bija e Faikut tregon për Fax News se me të atin dhe vëllain i ka shkëputur kontaktet prej 15 vitesh pasi nuk pranonin edhe lidhjen e saj me bashkëshortin që sot jeton dhe ka 2 fëmijë.
Ajo shprehet se Eglantina ishte zhdukur për 4 vite, ishte shfaqur, dhe më pas kishte qëndruar te shtëpia e saj. Pasi u njoh me dikë, dy motrat nuk ishin takuar më e as nuk kishin folur.
Gjatë bisedës, ajo flet për gjendjen e të ëmës që jeton tek i vëllai, divorcin e saj me Faikun, martesën e dytë e këtij të fundit me një grua nga Shkodra. Për njerkën, Elona thotë se e shkatërroi familjen pasi i dhunonte fëmijët e bashkëshortit.
Deklarata e plotë:
“Shkëlzeni nuk do të ishte i aftë të bënte asgjë në mendjen e tij, është shtyrë nga babai, madje edhe për atentatin ndaj Mishel Prelës. Babai nuk e lejonte të na takonte. Prej 15 vitesh kam shkëputur çdo kontakt me anëtarët e familjes, kur më vdiq vëllai nga sëmundja e rëndë, shkova vetëm ditën e varrimit.
Babi u divorcua nga mami në vitin 1993, pastaj u martua me një tjetër, njerka na ka dhunuar vazhdimisht, ajo na shkatërroi familjen, por edhe babi po ashtu. Nuk pranuan që unë të martohesha me bashkëshortin që kam. Ika nga shtëpia, tani jetoj në punën time, kam një vajzë dhe një djalë.
Nënën time, Nafije Bucin e mori daja dhe jeton aty, është në gjendje të mirë shëndetësore. Ngjarjen e morëm vesh ditën e premte me datë 4 shtator. Eglantina ishte zhdukur për 4 vite, ishte shfaqur, erdhi qëndroi tek shtëpia ime disa javë dhe njohu dikë me të cilin u takua. Nuk e kam parë kurrë më që atëherë. E kam thirrur në telefon, i kam shkruar në rrjetet sociale, asnjë përgjigje. Mësuam tani çfarë kishte ndodhur, nuk e di në fakt se çfarë ndodhi. I kishin marrë analizat e ADN-së, njerkës, prandaj kishin vonuar hetimet, ishin ngatërruar hetuesit. Pastaj morën të mamit dhe dolën që eshtrat ishin të Eglantinës.
Mendoja se është jashtë. E kërkova në telefon, në rrjetet sociale nuk mu përgjigj askund.”
