Situata nga Covid-19 duket serioze në vendin tone. Aktualisht në spitalin Infektiv dhe “Shefqet Ndroqi” po trajtohen 180 pacientë të konfirmuar pozitivë me Covid-19, 17 në terapi intensive nga të cilët vetëm 6 pacientë janë të intubuar.
Ditën e sotme një dëshmi e rëndë ka ardhur nga spitali Infektiv, ku një grua denoncon se nënës së saj që është e shtruar në këtë spital nuk i kanë dhënë as ujë.
“Nëna më tha nuk më japin ujë dhe nuk më ndërrojnë. Edhe koordinatorët nuk dinë të sillen. Shumë keq situata. Vijnë shumë dhe vdesin shumë. Nuk janë ato shifrat që publikojnë. Ndërkohë që nuk kemi asnjë lloj informacioni”, u shpreh gruaja për mediat jashtë Infektivit raporton Dosja.al.
Ajo kërkon që të marrë të ëmën në shtëpi dhe këtë kërkesë ua ka bërë edhe mjekëve.
“I thashë doktoreshës që ta marr nënën në shtëpi dhe të japë frymën e fundit, të vishet si njeri, mos ta hedhë me qese si…Mjekimi në Lushnje ishte i rëndë ia nisa në shtëpi dhe për dy ditë u bë më keq. E pashë që s’po shkonte mirë puna. Mora 127 e sollën direkt e në Tiranë. Prej 8 ditësh është e shtruar, prej dy-tri ditësh nuk kam asnjë kontakt me të. Infermierët s’kanë të drejtë të më informojnë, por as mjekët s’kanë komunikuar.”,-tha ajo.
Ky nuk është rasti i parë i të afërmve që denoncojnë për mungesë në shërbim dhe trajtim në të dy spitalet COVID në Shqipëri. Edhe më herët janë hedhur akuza për mjekët dhe personelin, por të gjitha këto deklarata janë përgënjeshtruar nga MSH.
