Pasi bëri bujë duke e nisur verën me super bashkëpunimin me Ledri Vulën për këngën DMP, Capital T ka ndërmend ta mbyllë verën në një mënyrë spektakolare.
(Mos harroni që në vjeshtë pritet të publikohet albumi i plotë, kështu që merreni me mend ç’po na pret.)
Autori i hitit “Akull” sapo ka publikuar këngën e tij të re që mban titullin “Braziliane”.
Në fakt ky projekt erdhi si një surprizë për publikun e vetëm disa ditë më parë, Capital T publikoi një foto i rrethuar nga disa vajza, duke na paralajmëruar për hitin e radhës.
Kënga tashmë gjendet në You Tube dhe është tejet ritmike, me nota e ngjyra tipike verore.
Këngëtari i këndon një bukurosheje (që ngjan si braziliane) dhe i ka marrë mendjen e zemrën.
Prej muajsh Capital T ka lajmëruar fansat se do publikojë albimin e tij të ri me një emër krejt të veçantë “Skulpturë”, që pritet të bëjë namin.
Albumi është i ndarë në dy pjesë dhe deri tani artisti ka publikuar vetëm pjesën e parë, e cila përbëhet nga 7 këngë: C’est la vie, DMP, Tu festu, Money, 600 PS, Flawless, Flex.
Sakaq, pak dimë nga pjesa e dytë e albumit, që pritet të publikohet së shpejti dhe përbëhet nga 8 këngë, 4 prej të cilave bashkëpunime.
Në një intervistë për “Prive” Capital T ka treguar se njëri prej bashkëpunimeve do jetë me Vig Poppën me të cilin ka bashkëpunuar edhe më herët në këngën “Pa cenzurë”.
Sakaq, ai ka treguar se do sjellë edhe një bashkëpunim me një artist ndërkombëtar, konkretisht bëhet fjalë për reperin grek Mente, dhe kjo na erdhi surprizë.
Dy emrat e tjerë ai nuk i ka zbuluar, por ka treguar se do jenë me artistë meshkuj, ndonëse njëri prej tyre mesa kemi kuptuar është 2PO2.
Albumi nuk e ka ende një datë publikimi, por ne mezi po presim.
