Ndërkohë që Ministria e Arsimit në Shqipëri, nuk ka bërë të ditur asnjë plan projekt për rifillimin e mësimit në shtator, Kosova është duke finalizuar një projekt ku janë analizuar të gjitha opsionet për zhvillimin e mësimit këtë vit të ri shkollor.
Kryeminsitri Avdullah Hoti bëri sot të ditur se janë duke u zhvilluar protokolle të veprimit se çfarë masa duhet të ndërmerren në çdo situatë që paraqitet. Ai u shpreh se komunat dhe drejtorët e shkollave do të kenë udhëzime të qarta se si duhet të organizohet mësimi, në varësi të kushteve që kanë në shkollat e tyre. Por Hoti nuk përjashtoi mundësinë që mësimi online të jetë gjithmonë aktiv.
“Mësimi online do të jetë gjithmonë aktiv. Janë duke u zhvilluar protokolle të veprimit se çfarë masa duhet të ndërmerren në çdo situatë që paraqitet. Do të ndërmerret një fushatë informuese për nxënësit dhe arsimtarët për masat mbrojtëse që duhet të zbatojnë. Mësimdhënësit janë duke u trajnuar për mësimin online, si dhe po punohet që të kemi listë rezervë të mësimdhënësve që mund të angazhohen sipas nevojës. Inspeksioni i arsimit do të jetë në mbështetje të shkollave për t’i udhëzuar për masat që duhet ndërmarrë, por edhe për të mbikëqyrë zbatimin e atyre masave”, njoftoi Hoti për masat e ndërmarra deri më tani.
Për rifillimin e shkollave në Shqipëri, është caktuar data 14 shtator, por ajo që duan të gjithë të dinë është nëse nxënësit do të rikthehen në bankat e shkollës apo mësimi do të vazhdojë online.
Skenari A: Rikthimi në shkollë!
Nëse Ministria e Arsimit vendos për të rikthyer nxënësit në shkollë, atëherë duhet të ketë një plan të qartë veprimi, se sa do të jetë numri i nxënësve në një klasë, në mënyrë që të ruhet distanca fizike; kush duhet t’i sigurojë masat mbrojtëse; a do të ketë kontroll të nxënësve për shenja të virusit me testime apo kontrolle shëndetësore, apo të tjera direktiva që duhet të merren parasysh në kushtet e pandemisë COVID-19.
Shembujt që na vijnë nga vendet e tjera nuk janë edhe aq pozitive për fillimin e mësimit në mes të një vale aktive nga pandemia. NY Times raporton se shkollat fillore nuk kanë qenë inkubatorë për virusin në vendet që kanë detyruar distancimin shoqëror dhe maskat, por ka pasur shpërthime të virusit në shkollat e mesme në Australi dhe Izrael (shiko këtu).
Fëmijët e parashkollorit, kanë më pak të ngjarë të përhapin virusin, por ata të moshave 10 vjeç e më lart, kanë po aq të ngjarë sa të rriturit ta transmetojnë atë, sipas një studimi të kohëve të fundit nga Koreja e Jugut.
Skenari B: Mësimi në shkollë dhe online!
Në skenarin B është paraparë kthimi i pjesshëm në shkolla apo mësimi i kombinuar-prezencë në shkolla dhe mësimi online.
Duke qenë se ministria nuk ka bërë ende publik asnjë plan veprimi apo protokoll për mësimin këtë vit të ri akademik, nuk dihet si do funksionojë shpërndarja e librave dhe si do të menaxhohet mësimdhënia. Cilat janë grupmoshat që e kanë më të nevojshme mësimin në shtëpi?
Një shqetësim tjetër është sesi do të bëhet mësimi i aksesueshëm për të gjithë nxënësit, pasi jo të gjitha familjet kanë akses në internet. Por edhe nëse mësimi bëhet në shkolla, atëherë përgjysmimi i klasave të nxënësve, do të kërkonte staf shtesë.
Skenari C: Mësimi Online!
Mësimi online në kushte pandemie i gjeti disi të papërgatitur mësuesit në vend. Nëse mësimi bëhet edhe këtë vit online, atëherë mësuesit duhet të ishin trajnuar për të dhënë mësim online. Sipas ministres Besa Shahini, po përgatitet një platformë e re online që do lehtësojë krijimin e klasave virtuale, por ende nuk dihet deri ku është arritur me këtë platformë.
“Kanali RTSH shkolla do të vazhdojë të punojë edhe gjatë verës, që në shtator të jetë tërësisht gati”, tha Shahini pak ditë më parë.
Një shqetësim jo pak i rëndësishëm që iconstyle.al ka ngritur prej kohësh është: A duhet të paguajmë tarifat e plota të shkollës nëse mësimi bëhet online?
98 % e pjesëmarrësve në sondazhin që realizuam, mendonin se tarifa duhet të ulet nëse mësimi do të zhvillohet online këtë vit të ri akademik dhe vetëm 2% mendonin se nuk duhet të ulet. Arsyet që numëronin për uljen e tarifave ishin nga më të ndryshmet (lexo këtu), por më kryesor ishte fakti që njohuritë e marra në shkollë/universitet nuk janë të njëjta me ato marra para një kompjuteri.
Shumë shpreheshin se kishin vështirësi financiare në këtë periudhë pandemie, që i ka gjetur prindërit e tyre pa punë. Një arsye jo pak e rëndësishme ishte fakti që duke qenë se nxënësit mësojnë nga shtëpia, atëherë nuk kanë përse të paguajnë për transportin, ushqimin në shkolla, dritat, internetin apo shpenzime të tjera të shkollave private, në një kohë që qëndrojnë në shtëpi. Mësimi online është një fenomen mbarëbotëror në këtë periudhë pandemie, dhe ka mjaft universitete apo kolegje në SHBA (Massachusetts Board of Trustees, Bergen Community College etj) që e kanë marrë në konsideratë uljen e tarifave ose ngrirjen e pagesave të shkollës në prag afati.
/Iconstyle.al
