Paraqitja në publik e kryebashkiakut Erion Veliaj, pasi e fitoi betejën me koronavirusin dhe doli negativ në tamponin e dytë, është bërë temë ditë sot në rrjetet sociale.
Përpoz fizikut më elegant dhe mjekrës, ka rënë në sy nxirja e tij! Shumë përdorues të mediave sociale nuk e besojnë që ka qenë i infektuar dhe madje shprehen se ngjyra e tij e nxirë e lëkurës tregon që ai ka qenë në plazh këtë periudhë, dhe jo në karantinën 14 ditore të detyruar pas infektimit me virusin.
Menjëherë pas intervistës së tij për mediat, janë përhapur meme-t dhe postimet në lidhje me nxirjen e Veliajt, me komente të tipit: “Nxirja e lëkurës sikur ke qenë dy javë në Dubai”.
I gjendur përballë këtyre akuzave Veliaj ka reaguar në një intervistë për FaxWeb.al, ku shprehet se ka qenë përditë në terren, dhe ndaj edhe lëkura e tij ka marrë ngjyrë.
“Shiko nuk kam bërë një gjë në jetën time që të mos jetë komentuar, unë besoj se secili prej nesh lë një gjurmë, dhe nuk mund ta kalosh jetën tënde duke sharë të tjerët. Unë kam qenë përditë në terren, dhe padyshim që do të isha nxirë, shpresa e tyre e vetme është që të vdesë kundërshtari, por një gjë ta kenë të sigurt që nuk kam për të vdekur shpejt”, u shpreh ai.
Në intervistën e tij të parë pas shërimit për Report Tv, Veliaj tregoi edhe nga hetimi epidemiologjik, ka rezultuar se ai ishte infektuar në takimet familjare, teksa ka zbuluar se ka qenë fillimisht djali i tij, Kajan që kishte shfaqur i pasi simptomat, më pas bashkëshortja dhe ai.
“Ishin takime jashtë pune. Asnjë nga kabineti i punës nuk rezultoi pozitiv, kështu që unë isha i vetmi. Ne e kaluam të gjithë në shtëpi, fillimisht u sëmur djali, me temperaturë 38, menduam se kishte dhëmballë, më pas hetimi profesional tregoi që kishte kaluar ai COVID, bashkëshortja dhe pastaj unë. Dhe u futa në karantinë. Ishin dy javë sfiduese, nuk ia uroj as armikut më të madh. Pak kujdes nuk na bën keq”, tregon Veliaj.
Por 3 ditë para së të njoftonte publikisht se është i infektuar me COVID-19, kryebashkiaku kishte pritur në takim një grup të moshuarish, ndërkohë që vetë nuk mbante as maskë dhe as doreza (shiko këtu).
Duke qenë se simptomat shfaqen disa ditë me vonesë, rreziku që Veliaj ta ketë patur virusin kur është takuar me të moshuarit, të cilët janë në një moshë që preken më shpejt, ka qenë i madh.
Vetë Veliaj ka bërë disa herë apel për respektimin e masave dhe mbajtjen e maskave, por në rastin konkret nuk i ka zbatuar ato. Madje as gjatë intervistës të dhënë sot në zyrën e bashkisë me gazetarin e Report Tv, nuk mbante maskë dhe doreza.
