Të paktën pesë njerëz kanë humbur jetën pasi shiu i rrëmbyeshëm dhe stuhitë shkaktuan përmbytje në ishullin Grek të Evias gjatë fundjavës.
Shumica e viktimave, përfshirë një fëmijë, u gjetën afër shtëpive të tyre në Evia, në veri-lindje të Athinës, thanë zyrtarët e zjarrfikësve. Forcat janë ende në kërkim të dy personave që u raportuan të zhdukur.
Departamenti i zjarrfikësve mori qindra thirrje për të larguar ujin nga shtëpitë dhe automjetet.
Dhjetra u evakuuan dhe tetë njerëz u shpëtuan me helikopter ndërsa rrugët u përmbytën pasi lumi kishte dalë nga shtrati.
“Lutjet tona janë me njerëzit që nuk ia dolën”, tha zëvëndës Ministri i Mbrojtjes Civile Nikos Hardalias për gazetarët, pasi vizitoi zonën.
“Ne jemi ballafaquar me fenomene që nuk i kemi përjetuar më parë,” tha ai.
Hardalias tha se dëmet e shkaktuara nga stuhia ishin të mëdha në zona të caktuara të Evias qendrore. Kryeministri Kyriakos Mitsotakis pritet të vizitojë rajonin të hënën.
Njëzet e katër njerëz u vranë kur u përmbyt qyteti Mandra në perëndim të Athinës në nëntor 2017, dhe shtatë u vranë në një stuhi të ashpër në veri të Greqisë në korrik 2019.
/Reuters
