90% e një grupi pacientësh të rikuperuar nga koronavirusi nga një spital në qytetin Wuhan të Kinës ku shpërtheu pandemia, kanë raportuar dëmtim të mushkërive dhe 5% e tyre janë përsëri në karantinë pasi kanë rezultuar sërish pozitivë virusin, sipas një studimi,
Një ekip në Spitalin Zhongnan të Universitetit Wuhan të udhëhequr nga Peng Zhiyong, drejtor i Njësisë së Kujdesit Intensiv të spitalit, ka kryer vizita me 100 pacientë të shëruar që nga prilli.
Faza e parë e këtij programi njëvjeçar përfundoi në korrik. Mosha mesatare e pacientëve në studim është 59. Sipas rezultateve të fazës së parë, 90% e mushkërive të pacientëve janë ende në një gjendje të dëmtuar, që do të thotë se funksioni i mushkërive dhe ai i shkëmbimit të gazit nuk janë rikuperuar në nivelin e njerëzve të shëndetshëm.
Nga studimi u zbulua se pacientët e rikuperuar mund të ecnin vetëm 400 metra në 6 minuta, ndërsa bashkëmoshatarët e tyre të shëndetshëm mund të ecnin 500 metra në të njëjtën periudhë kohore. Rezultatet treguan gjithashtu se antitrupat kundër koronavirusit të ri në 10% të 100 pacientëve janë zhdukur.
Sistemet imunitare të pacientëve nuk janë rikuperuar plotësisht pasi treguan një nivel të ulët të qelizave B – një forcë kryesore për të vrarë viruse në trupin e njeriut – por një nivel të lartë të qelizave T, që njohin vetëm antigjene virale jashtë qelizave të infektuara.
“Rezultatet zbuluan se sistemet imunitare të pacientëve janë ende në shërim,” tha Peng.
Pacientët gjithashtu pësuan depresion dhe një ndjenjë ankthi. Shumica e pacientëve të rikuperuar i thanë ekipit se familjet e tyre nuk ishin të gatshme të hanin darkë me ta në të njëjtën tryezë.
Provinca Hubei ka raportuar gjithsej 68,138 raste të konfirmuara me COVID-19 deri tani.
/Iconstyle.al
