Të paktën 50 persona kanë humbur jetën dhe mbi 3,000 të tjerë kanë mbetur të plagosur pas shpërthimit në Bejrut të Libanit, e fatkeqësisht bilanci pritet të thellohet. Nga pamjet e publikuara në media duket se të lënduarit po marrin kujdes shëndetësor në rrugë apo në parkingje pasi spitalet e zonës janë shkatërruar. Kurse, personat që janë në gjendje të rëndë janë transportuar në spitalet jashtë qytetit, ku siç shihet edhe nga videot, gjendja është kaotike.
https://www.instagram.com/p/CDezO0-guxd/?igshid=1218ggib63psq
Në rrugë mund të shihen njerëz që u lexohet terrori në sy, ndërsa nuk mungojnë njollat e gjakut e plagët në trupat e tyre. Ndërkohë, Ministri i Brendshëm i Libanit Mohammed Fehmi është shprehur se shpërthimi i fuqishëm mund të jetë shkaktuar nga materialet plasëse që mbaheshin në portin e Bejrutit, por ende nuk ka një shkak zyrtar të kësaj ngjarjeje tragjike.
Konsulli i nderit i Shqipërisë në Liban, Marc Ghorayeb, është pyetur nga gazetari Muhamet Veliu për Top Channel, se nëse në qytet ndodhej ndonjë shtetas shqiptarë si vizitor, për qëllime biznesi apo si i punësuar në portin ku ndodhi shpërthimi.Marc Ghorayeb është shprehur se deri më tani nuk ka asnjë informacion se ndonjë shtetas shqiptar mund të ketë humbur jetën apo dhe të jetë plagosur.
“Ishte një shpërthim shumë i madh. Ndoshta më i madhi ndodhur ndonjëherë në këtë rajon. Deri më tani nuk kemi asnjë lajm për shqiptarë të vdekur apo të plagosur pasi presim nga policia raportet zyrtare. Janë disa shqiptarë që punojnë shumë larg Bejrutit në zonën e njohur si Tripoli Libanit në veri dhe disa të tjerë në zonën e Beka. Ata janë mirë. Mund t’ju them se të plagosurit deri më tani janë mbi 5.000. Shumë kanë humbur shtëpitë dhe spitalet janë plot. 50 të vdekur deri më tani. Nëse do të kemi të reja do t’ju themi. Nëse ndonjë shqiptarë ndodhet në Liban të mos hezitojë të kontaktojë konsullatën në numrin që ndodhet online. Mos hezitoni të na kontaktoni. Kam një thirrje për të gjithë ata shqiptarë që mund të kenë hyrë në Liban të regjistrohen në konsullatë dhe të na thonë për situatën ku ndodhen.”– është shprehur Marc Ghorayeb.
Mediat e huaja thonë se dëmet materiale janë shumë të mëdha, duke shkatërruar gjithçka në qendrën historike të qytetit, por padyshim vëmendja është te njerëzit në këto momente dhe nxjerrja e trupave nga rrënojat. Ndërkohë që dita e mërkurë është shpallur ditë zie.
https://www.instagram.com/p/CDeblaQA5-e/
