Ditën e djeshme, Ministria e Shëndetësisë njoftoi se testimet serologjike do të bëhen së shpejti në laboratore private, në funksion të rritjes së kapaciteteve për përballimin e situatës me pandeminë!
Komiteti Teknik i Ekspertëve, ka miratuar Protokollin për fillimin testimeve serologjike në strukturat jopublike. Testet duhet të jenë të validuara paraprakisht nga Instituti i Shëndetit Publik, por para se të mbërrijmë tek licencimi i tyre, pyetja që shtrojmë ne është: A do të paguajmë për testet serologjike?
Ligji shqiptar: Diagnoza dhe kura për të sëmurët nga sëmundjet epidemike, falas!
Së pari, ligji shqiptar për luftimin e epidemive sanksionon që trajtimi i të sëmurëve të bëhet falas. Legjislacioni shqiptar shprehet qartë se diagnoza dhe kura për të sëmurët nga një sëmundje epidemike duhet të ofrohet pa diskriminim dhe falas, pavarësisht nëse institucioni që e ofron është publik apo privat.
Këtu u bazua edhe hetimi i ngritur në mars nga Prokuroria e Tiranës për Spitalin Amerikan, i cili sipas burimeve për iconstyle.al asokohe, jo vetëm që kishte nisur testimet në një kohë që ishte i pacertifikuar nga ISHP, por i ofronte ato në çmimet abuzive 300-400 euro.
“iconstyle.al” ka kontaktuar sot me drejtoreshën e ISHP-së, Silva Binon, e cila u shpreh se çmimi i analizave serologjike është një kompetencë e Ministrisë së Shëndetësisë.
“Është e vërtetë që testimet serologjike do të ofrohen në shumë laboratorë veç atij që ka kryer deri tani, në departamentin e mikrobiologjisë pranë QSUT. Këto nuk janë testime që lidhen me diagnozën e COVID-19 dhe trajtimin e sëmundjes, por për të parë nëse personi ka qenë më parë i infektuar apo me tej, për të studiuar mbrojtjen imunitare. Në lidhje me çmimin, kjo nuk është kompetenca jonë dhe mund t’i drejtoheni Ministrisë së Shëndetësisë”, u shpreh Bino për iconstyle.al.
Në një komunikim me zëdhënësen e Ministrisë së Shëndetësisë, kjo e fundit tha për “iconstyle.al” se është shumë herët të flitet për pagesën. Por edhe sikur të mos përfshihej në legjislacionin shqiptar, kryerja e testeve serologjike falas, çfarë po bën shteti?
Taksapaguesit shqiptarë do të paguajnë dyfish?
Një prej laboratorëve më të mëdhenj në vend, Intermedica, ka bërë me dije se është i licencuar dhe do të bëjë analiza me dy kompani që janë më të mëdhatë në tregun botëror, që janë Euroimun dhe kompania zvicerane Roche, e cila kryen 4.128 testime në ditë.
Ndërkohë që privati i ka këto kapacitete për të kryer analizat, përse shteti shqiptar refuzon që të blejë po të njëjtën pajisje e ta vërë në dispozicion të ISHP-së?
Pak kohë më parë, iconstyle.al vuri në dukje se edhe pse në periudhë pandemie, janë lënë tërësisht në hije laboratorët që janë pjesë e koncesionit të check-up-it, koncesion 10-vjeçar me një vlerë prej 120 milionë eurosh që e paguajnë pikërisht taksapaguesit shqiptarë.
Kështu shqiptarët do të detyrohen të paguajnë dyfish, nëse duan të bëjnë këto analiza serologjike, njëherë privatit dhe njëherë për koncensionin që e paguajmë pikërisht me taksat tona.
Kontrata e koncesionit të check-up-it, parashikon një numër prej 475 mijë kontrollesh bazë në vit, të cilat asnjë vit nuk janë kryer të plota, e megjithatë paguhen nga shteti shqiptar si të ishin kryer të gjitha.
Vetëm për këto kontrolle të pakryera, taksapaguesit shqiptarë i kanë paguar kompanisë “3P Life Logistic” të Vilma Nushit plot 6.5 milionë euro në harkun kohor të 4 viteve, sipas një raporti të KLSH-së, pagesë që është marrë për shërbime të pakryera, vetëm sepse kontrata e koncesionarit është përpiluar në mënyrë të tillë për të mbrojtur subjektin privat.
Tani që jemi në kulmin e pandemisë, shërbimet e këtyre laboratorëve mund të përshtateshin fare mirë për t’i shërbyer qytetarëve në luftën kundër COVID-19 për një testim më masiv, por jo, edhe këtë herë barra do të bjerë mbi supet e shqiptarëve!
/Iconstyle.al
