Nga dita e nesërme do të përgatitet rihapja e spitalit Covid 2, pra spitalit “Shefqet Ndroqi”, i cili do të nisë të zbrazet, pasi situata është tejet e rëndë. Ky vendim i Ministrisë së Shëndetësisë vjen pas rritjes së numrit të rasteve të personave të prekur me koronavirus në vend ndonëse vendimi nuk është bërë publik zyrtarisht nga Ministria e Shëndetësisë, raporton News 24.
Spitali “Shefqet Ndroqi” i njohur ndryshe dhe si Sanatoriumi u bë spital Covid 2, por me rënien e numrit të personave të infektuar me Covid-19 u rikthye ne funksionet e tij.
Ndërkohë, mësohet se të sëmurët kronikë që duhet të trajtohen te “Shefqet Ndroqi” do zhvendosen te ish-Kirurgjia në QSUT.
Këtë mëngjes, Ministria e Shëndetësisë informoi se në 24 orët e fundit kanë humbur betejën me sëmundjen 4 qytetarë: dy prej tyre 57-vjeçare nga Shkodra dhe Dibra, një pacient 75-vjeçar nga Durrësi dhe një paciente 81-vjeçare nga Tirana.
Edhe në spitalin Infektiv gjendja vijon të paraqitet e rënduar, pasi në 24 orët e fundit ka shtim të pacientëve edhe të moshave të reja. Aktualisht janë të shtruar 72 pacientë në spital, 8 pacientë janë në terapi intensive në gjendje serioze dhe 4 prej tyre janë të intubuar në gjendje të rëndë. Gjatë 24 orëve të fundit janë kryer 420 testime për të dyshuar të prekur me Covid-19, nga të cilat janë konfirmuar 83 raste pozitive.
/GazetaReforma.com
