Në një kohë që të gjitha vendet europiane dhe jo vetëm, po mendojnë sesi të ringrejnë turizmin pas pandemisë me rimbursime të pagesës së pushimeve apo me bonuse e promocione që i shtyjnë popujt t’i bëjnë pushimet në vendet e tyre, në Shqipëri, turizmi ka rënë në koma!
Pas deklaratës së ministrit të Turizmit, Blendi Klosi për zgjatjen e sezonit turistik deri më 15 nëntor , sot në sallën e Kuvendit të Shqipërisë, u dha një tjetër ide haluçinante për të ringritur turizmin. Ish-ministri i Shëndetësisë, Ilir Beqja kërkoi më shumë pushime për administratën gjatë javës, dhe propozoi që në muajt e verës, e premtja dhe e hëna të jenë pushim.
“I kërkoj qeverisë nga sot deri në 14 shtator kur fillon shkolla janë 9 javë, të mund të marrë në konsideratë që në 2 ose 3 fundjava ta bëjë ditë pushim edhe një të premte dhe një të hënë, që njerëzit të kenë mundësi për më shumë alternativa, të mos mbivendosemi të gjithë në gusht dhe te çlodhemi edhe ndihmojmë ekonominë”, u shpreh ai.
Ky propozim aspak i dobishëm vjen në një kohë, që shqiptarët dhe sektori i turizmit kanë nevojë më tepër për masa lehtësuese dhe bonuse për pushime, sesa ditë pushimi.
Mjafton t’i kthejmë sytë nga fqinji ynë, Greqia, për të parë se çfarë masash janë ndërmarrë atje për të ringritur turizmin, dhe për të bërë që të gjithë shtetasit grekë, kanë apo jo mundësi, të pushojnë në vendin e tyre.
Greqia: Pushime për të gjithë, 60 % i paguan shteti!
“Turizëm për të gjithë” kështu quhet programi i ri i qeverisë greke që ju vjen në ndihmë shtetasve duke rimbursuar deri në 60 për qind të shpenzimeve të pushimeve. 30 milionë euro është buxheti i Ministrisë së Turizmit, për t’i shtyrë qytetarët të shijojnë pushimet në vendin e tyre nga korriku deri në fund të vitit. Ky program funksionon në formën e një lotarie, ku t’i mund të aplikosh dhe përzgjidhesh për të fituar akomodime me çmime më të ulëta. Aplikimet janë zgjatur deri në 11 korrik 2020 pasi ka pasur shumë kërkesa.
Italia: Bonus pushimesh deri në 500 euro!
Pas Greqisë, shkojmë në Itali aty ku shteti po aplikon një paketë bonusesh, prej 2,4 miliardë eurosh për të financuar pushimet për shtetasit e vet. Bonusi i pushimeve të vitit 2020 është një kontribut deri në 500 euro për të kaluar pushimet në Itali. Duhet të aplikosh dhe të marrësh në internet një kupon, përmes aplikacionit IO.
Ky kontribut ekonomik duhet të shpenzohet për pushime në Itali në të gjitha kompanitë që kanë kodin Ateco 55: në fshatrat italianë, hotele, kampe, dhe ferma. Kjo vlen për familjet që kanë të ardhura jo më shumë se 40 mijë euro dhe mund të merret nga vetëm një anëtar i familjes. 500 euro jepen për ata me një fëmijë; 300 euro për dy persona; 150 euro për individët.
Britania e Madhe: Ha në restorant se gjysmat t’i paguan ministri!
Ndërkohë, në Britaninë e Madhe, Rishi Sunak, kancelar në qeverinë e kryeministrit Boris Johnson ka paraqitur një paketë ndihme për restorantet, ku britanikët do të paguajnë gjysmën e shpenzimeve kurse pronarët do të rimbursohen nga shteti.
Dhe ideja është super e thjeshtë: Ulu, ha në restorant dhe automatikisht do të keni zbritjen 50% të çmimit. Më pas, pronari i restorantit ose menaxheri i pub-it do të rimbursohet nga shteti brenda 5 ditësh.
Zbritja e çmimeve me 50%, në bare dhe restorante, në të gjithë Mbretërinë e Bashkuar, është në mesin e shumë masave të njoftuara, të cilat së bashku me ato të muajve të fundit sipas “Financial Times” do të kushtojnë mbi 350 miliardë paund (rreth 390 miliardë euro, dyfish më shumë se në krizën e vitit 2008 në Mbretërinë e Bashkuar).
Këto janë shembujt e vetëm që duhet të ndjekim tani që jemi në pikun e sezonit turistik, dhe sektori i turizmit është i pashpresë. Eksperti i turizmit Besnik Vathi u shpreh pak ditë më parë për Shqiptarja.com se deri më tani është realizuar deri në 4% të turizmit të vitit të kaluar. Duke folur për rimëkëmbjen e sektorit, eksperti propozoi përdorimin e bonuseve për vendasit që pushimet t’i bëjnë në Shqipëri.
“Duke i mbështetur këto biznese me grante, kredi sovrane 100%, edhe kredi të kombinuar, me incentiva me bonuse, me qëllim që ky aktivitet të mos vdesë dhe të ringjallet në një të ardhme kur kushtet të kenë ndryshuar. Bonuse për pushime për qytetarët shqiptar, dhe të jenë të vlefshme të shfrytëzohen edhe përtej sezonit veror”, deklaroi ai.
Dhe meqenëse jemi në korrik, masat të tilla duhet të merren urgjent nëse duam që t’i japim forcë mushkërisë së zhvillimit ekonomik të vendit, siç është turizmi!
/Iconstyle.al
