Kur kanë kaluar rreth 20 orë nga lajmi për aktakuzë, presidenti Hashim Thaci ka reaguar përmes një postimi në faqen e tij zyrtare në Facebook, ku shihet se ka ndryshuar foton kryesore, duke vendosur emblemën e UÇK-së.
Thaçi ka zgjedhur këtë mënyrë për të dhënë mesazhin e tij, vetëm me një foto, duke mos thënë asnjë fjalë.
Ditën e djeshme presidenti i Kosovës, Hashim Thaçi, kreu i PDK-së, Kadri Veseli dhe 9 ish-luftëtarë të UÇK-së janë paditur penalisht nga Prokuroria pasi akuzohen për një sërë krimesh lufte, përndjekje e tortura.
Në një njoftim zyrtar Zyra e Prokurorit të Specializuar ka njoftuar se presidenti i Kosovës Hashim Thaçi dhe Kadri Veseli janë dy të akuzuarit e parë pritet të paraqiten në Gjykatën Speciale në Hagë.
Në njoftimin për media thuhet se Thaçi dhe Veseli dyshohen për 100 vrasje, mes të cilave, viktima të identifikuara shqiptarë, serbë dhe romë të Kosovës dhe kundërshtarë politikë.
Publikimi i akuzave është bërë në një kohë kur Kosova dhe Serbia po përgatiten për dialogun në Shtëpinë e Bardhë.
Një ditë më parë vizitën për në SHBA e presidenti Thaçi e anuloi, ndërsa sot ka konfirmuar mospjesmarrjen edhe Kryeministri Hoti.
