Në një kohë që rritja e numrit të të infektuarve ditorë ka marrë përmasa të frikshme në vendin tonë me 71 të prekur vetëm këtë të diel, rritja e vigjilencës dhe zbatimi i rregullave të distancës sociale është arma e vetme që kemi për t’i shpëtuar virusit vdekjeprurës!
Kjo pasi që nga momenti që je i detyruar të shtrohesh në spitalin Infektiv, lufta me COVID-19 bëhet më e vështirë se kurrë, për të mos thënë e pamundur, duke marrë parasysh kushtet skandaloze në të cilat ndodhet sot mjekësia shqiptare.
Përballë gjithë kësaj moskokëçarjeje që ëshë krijuar në mesin e qytetarëve apo një lloj skepticizmi në lidhje me situatën, “iconstyle.al” ju sjell sot në vëmendje situatën e frikshme nga brenda spitalit të Infektivit.
Një prej pacientëve bën me dije se kushtet brenda këtij spitali janë në realitet shumë larg nga ajo çfarë propagandohet në media.
Situata është alarmante dhe askush s’po bën asgjë për ta ndryshuar!
Problemi numër 1 janë kushtet higjienike skandaloze me banjot e pista ku higjena duhet të ishte maksimale.
Gjithashtu raportohet edhe një mungesë uji që është i domosdoshëm dhe jetik në ditët e sotme.
Çfarë është akoma më shqetësuese është fakti që mjekët janë akoma më indiferentë dhe mësohet se duhet të kesh lidhjet e duhura me stafin drejtues të spitalit, që pacientët të mund të marrin vëmendjen e duhur.
Ndryshe nga ç’thuhet në media për faktin se përdoret Actemra (Tocilizumrab), në fakt në spitalin COVID tashmë kjo nuk përdoret dhe ndryshe nga ç’është thënë nga studimet e mëparshme se ibuprofeni nuk sugjerohet në raste të tilla, mjekët u kanë dhënë pacientëve pikërisht këtë medikament, duke ngritur dyshime të forta për mjekim të pakujdesshëm.
Kjo është hera e parë që “iconstyle.al” ka një dëshmi të një pacienti brenda këtij spitali, që na ka treguar realisht se çfarë ndodh atje dhe është shumë larg jo vetëm asaj që propagandohet në media, por edhe asaj që duhet realisht të jetë. Nëse do t’i kushtohej pak më shumë vëmendje shërbimit në spitalin COVID, mbase do të kishim më pak jetë të humbura dhe të infektuar gjithashtu.
Siç është diskutuar edhe në media, ka qenë shumë shpesh pakujdesia e stafit të spitalit ajo që ka sjellë shpërndarjen e virusit dhe e gjithë kjo po e çon vendin tonë drejt një kolapsi, sepse po i rikthehemi edhe njëherë situatës së marsit dhe mbase gjendja do të përshkallëzojë më keq.
Aktualisht në shërbimin Infektiv po marrin shërbim 78 pacientë, 10 prej tyre janë në terapi intensive ndërsa 1 është i intubuar.
Një nga pacientët nga i cili mundëm të merrnim këtë dëshmi ka treguar se trajtimi i parë që ka marrë nga mjekët është paracetamoli dhe ibuprofeni, në vend të ndonjë mjekimi antiviral i cili është i nevojshëm.
Në 3 muajt e fundit kur duhet të ishin marrë masat për një rritje të numrit te te infektuarve pas lehtësimit të masave, Ministria e Shëndetësisë duket se ka mbetur në vend numëro.
….
