Më në fund duket se është arritur marrëveshja për mbeturinat e qytetit të Durrësit, që krijoi kaos në qytetin bregdetar, në pragun e sezonit turistik.
ABC News shkruan se marrëveshja është dakordësuar mes Bashkisë së Durrësit, qeverisë dhe drejtuesve të impiantit të përpunimit në Sharrë, për transportimin e mbetjeve drejt Sharrës pa pagesë për 4 muaj.
Burime për ABC News thonë se nesër kryebashkiakja e Durrësit është thirrur në Kryeministri, ku do takohet me kryeministrin Rama, për të diskutuar për mbetjet dhe planin e rindërtimit post-tërmet.
Pak më herët kryeministri Edi Rama u shpreh përmes një postimi në Twitter, se nuk do të ketë hedhje plehrash në asnjë zonë të bashkisë Durrës në këtë fazë tranzicioni.
“Në vend që ta dizinformojnë publikun dhe të keqpërdorin shqetësimin qytetar, për audiencë dhe për të nxitur shfaqjet e pakënaqësisë që ushqehet me lajme të rreme, mediat duhet t’u thonë durrsakëve se s’do të ketë hedhje plehrash në asnjë zonë të bashkisë në këtë fazë tranzicioni!”, shkruan Rama.
Pas mbylljes së landfillit në Porto Romano, Durrësi shpalli gjendjen e emergjencës mjedisore në mes të sezonit turistik.
Depozitimi i mbetjeve në Sharrë kapte vlerën 29 euro/ton, dhe bashkia u përball me mungesën e fondeve për të dërguar dhe trajtuar mbetjet e saj në Sharrë.
Pas ngërçit bashkia i dërgoi mbeturinat në Manzë javën e kaluar, duke krijuar një katastrofë mjedisore me djegien e tyre shumë pranë banesave të banorëve të fshatit.
U tentua gjithashtu edhe një marrëveshje me banorët e fshatit Vadardhë të Sukthit, por sërish nuk u arrit një dakordësi. Të shqetësuar, ata bllokuan rrugën me goma dhe sende të tjera që kamionët e mbeturinave të mos kalojnë (lexo këtu).
Tani, për 4 muaj me radhë bashkia do të depozitojë mbetjet urbane në Landfillin e Sharrës, pa pagesë!
/ABC News
