Një valë e gjerë protestash shpërtheu në SHBA pas vdekjes së një afroamerikani, i cili u neutralizua dhunshëm nga disa oficerë gjatë një arrestimi, duke bërë që të humbasë jetën.
Pamjet e viktimës së shtrirë në tokë, me efektivin që i kishte vendosur gjurin në qafë, janë shpërndarë gjerësisht në internet, për të treguar sjelljen raciste të efektivëve, ndaj një personi me ngjyrë të paarmatosur dhe që as nuk po bënte rezistencë.
George Floyd ndërroi jetë shumë pak kohë pasi tha se nuk merrte dot frymë nga shtrëngimi i tepërt i efektivit në një rrugë në Minneapolis, Minesota.
Demonstruesit dolën dje në rrugën ku vdiq Z. Floyd, me brohoritje dhe pankarta që lexonin “Unë nuk mund të marr frymë”, pasi marshuan drejt një stacioni policie, ku u dëmtuan dritaret dhe një makinë patrullimi.
Policia u konfrontua me protestuesit duke hedhur gaz lotsjellës. Disa nga demonstruesit përdorën karroca për të bërë një barrikadë në një supermarket aty pranë, dhe përleshjet e tensionuara vazhduan më vonë në mbrëmje.
FBI dhe agjentët e shtetit po hetojnë pas vdekjes të hënën në mbrëmje ndërkohë që 4 efektivë të lidhur me ngjarjen u pezulluan nga detyra.
Burri që vdiq u identifikua si George Floyd nga Ben Crump, një aktivist i të drejtave civile dhe avokat i punësuar nga familja e Floyd.
“Ne të gjithë e kemi parë vdekjen e tmerrshme të George Floyd në video ndërsa dëshmitarët iu lutën oficerit të policisë që ta merrte në makinën e policisë dhe të hiqte këmbën nga qafa e tij”, tha Crump në një deklaratë. “Ky përdorim abuziv, i tepërt dhe çnjerëzor i forcës i kushtoi jetën e një burri që ishte duke u ndaluar nga policia për t’u marrë në pyetje për një akuzë jo të dhunshme.”
https://www.instagram.com/p/CAsKK7sgmWz/
“Më dhemb stomaku. Qafa më dhemb. Gjithçka më dhemb. … Unë kam nevojë për ujë. Ju lutem. Ju lutem. Nuk mund të marr frymë, oficer. … Nuk mund të marr frymë. Nuk mund të marr frymë”, dëgjohet të thotë viktima në video i cili shihet teksa rënkon nga dhimbja!
Kalimtarët që dëshmuan rastin i kërkuan oficerit të ndalet dhe t’i kontrollojë pulsin, por ishte e kotë!
