Ndonëse situata po shkon drejt normalizimit dhe kemi nisur pak nga pak të bashkëjetojmë me Covid-19, thirrje për kujdes dhe vigjilencë nga ekspertët mbetet e pandryshueshme.
Ditët e fundit janë shënuar dy viktima, teksa sot bilanci u thellua,pasi u identifikuan 25 raste të reja.
Kështu, në mbledhjen e fundit të Komitetit Teknik, shefja e Shërbimit Infektiv në QSUT, Najada Çomo deklaroi se fakti që ka pasur dy vdekje brenda pak ditësh tregon që graviteit i sëmundjes vazhdon.
Çomo theksoi se në spital ka raste të rënda që po marrin trajtim dhe në kushte të tilla bashkëpunimi me qyetarët për të zbatuar distancimin social dhe kushtet e higjenës mbetet i rëndësishëm për të ruajtur shifra të ulëta të pacientëve të shtruar.
“Duhet të jemi realistë që ka persona të shtruar në spitalin infektiv që janë në gjendje jo të mirë shëndetësore dhe duke patur parasysh që kemi patur dy vdekje brenda pak ditësh tregon për vazhdimin e gravitetit të sëmundjes, pa çka se shifra është nën 20. Por kjo shifër mund të zvogëlohet ose të shtohet në ditët në vijim. Masat e marra dhe pjesa e ruajtjes së distancimit janë elementë shumë të rëndësishëm për të ruajtur shifrat e ulëta të pacientëve të shtruar në shërbimin infektiv”, tha Çomo.
Ndërsa Tritan Kalo apeloi për vetëndërgjegjësim nga qytetarët.
“Sfida me COVID-19 ende nuk ka përfunduar ndaj masat e vetëndërgjegjësimit dhe kujdesit ndaj vetes mbeten në fuqi sot, nesër dhe në të ardhmen”, tha Kalo.
Nga ana tjetër, shefja e Departamentit të Epidemiologjisë dhe Kontrollit të Sëmundjeve Infektive në ISHP, Silva Bino, tha se edhe të rinjtë janë të rrezikuar nga Covid-19, prandaj duhet të kenë kujdes.
Bino tha se transmetueshmëria e sëmundjes vazhdon të mbetet e lartë, pavarësisht se në vendin tonë nuk kemi qarkullim të dendur.
“Rritja e numrit të rasteve sidomos në Tiranë tregon se sa të kujdesshëm duhet të jemi. Është koha që të rinjtë të jenë të përgjegjshëm, që e gjithë popullata të jetë e përgjegjshme në mënyrë që të ruajmë distancën dhe rregullat e higjenës”, tha Bino.
Në Shërbimin Infektiv i konsideruar si spitali Covid 1, aktualisht po trajtohen 17 pacientë, nga të cilët 3 janë në terapi intensive. /gazetareforma
