Blendi Shahu, 23 vjeçari i cili është bërë një figurë e njohur e mediave sociale pas fotos së përleshjes me policinë gjatë protestës për Teatrin Kombëtar, ka treguar se çfarë ndodhi atë ditë.
Në një intervistë për Zërin e Amerikës ai theksoi se qëndrimi i tij ishte krejt paqësor dhe nuk pati në asnjë moment kundërshtim të urdhrave të policisë.
“Qëndrimi ynë aty ishte krejt paqësor. Madje ishim në momentet e fundit të protestës simbolike, dhe për pak minuta do të iknim vet, por policia erdhi dhe na largoi me forcë. Ne nuk e kundërshtuam me forcë policinë. Ishim të ulur paqësisht në rrugë për të shprehur simbolikisht një mendim tonin. Ka dhjetëra filmime që tregojnë se ne ishim aty krejt paqësorë”.
Blendi thotë se shembja e ndërtesës së Teatrit Kombëtar ishte një gabim pasi ishte një ndërtesë e trashëgimisë kulturore të popullit shqiptar.
“Unë vet personalisht nuk kam patur shumë mundësi të shkoj te Teatri dhe ta ndjek protestën bashkë me Aleancën për Mbrojtjen e Teatrit. Me aq sa kam patur mundësi i kam mbështetur ata moralisht, edhe në bisedat me miq e shokë, sigurisht. Ajo ishte një ndërtesë e vjetër e trashëgimisë kulturore. Çdo ndërtesë e hershme e trashëgimisë kulturore është e padrejtë të prishet. Shpresojmë të mos kemi më ngjarje të tilla”
Sipas studentit policia ka abuzuar me pozitën e vet në ato momente. Ai refuzoi t’i tregonte para kameras shenjat e prangave nëpër kyçet e duarve, sepse tha që shokët e tij i kishin më keq plagët dhe gjurmët e ndërhyrjes së policisë.
“Është një abuzim i policisë ndaj gjithë atyre protestuesve. Nuk besoj se atje ka pasur protestues jopaqësorë. Miqtë e mi që ishin aty asnjë nuk është jopaqësor. Ne jemi artistë, student të arteve’.
Blendi shtoi se në atë tubim të pasdites afër parkut Rinia pjesa më e madhe ishin rreth 20 vjeçarë, dhe ndërhyrja e policisë nuk përputhej me sjelljet paqësore të studentëve. 23-vjeçari kërkoi ndihmë për veten dhe të tjerët që po hetohen, sepse të gjithë ishin aty për kulturën.
“Shpresoj se të gjithë ne që po akuzohemi dhe do të dalim para gjykatës duhet të na ndihmojë dikush. Ne ishim aty për Teatrin dhe më shumë se Teatrin, ishim për kulturën. Nuk mund të lihemi pa mbështetje as unë që hetohem në gjendje të lirë as të tjerët që janë ende nëpër qeli. Dikush duhet të na ndihmojë”.
/Zeri i Amerikes
