Shkatërrimi i Teatrit Kombëtar në orët e para të së dielës së 17 majit, ishte një prej ngjarjeve më të dhimbshme në historinë kulturore të Shqipërisë, që përtej debatit nëse duhej apo jo të shembej, la një gjurmë të shëmtuar e të hidhur për mënyrën sesi u krye. Ende pa zbardhur, pa lajmërim, të përfshirë nga dhuna policore ndaj protestuesëve e madje pa nxjerrë ende prej ndërtesës objekte me vlerë të pazëvendësueshme si kostumet, butaforitë etj.
E më keq akoma, me një plan për të marrë kredi për të vënë në jetë projektin e ri, ndërkohë që familjet e prekura nga tërmeti viojnë ende të jenë në rrugë e bizneset që u mbyllën për më shumë se 2-muaj nga pandemia po falimentojnë dita ditës për shkak të mungesës së një mbështetjeje financiare. A ishte një kullë më tepër në Tiranë më keq se prishja e Teatrit Kombëtar dhe ndërtimi i një të riu me kredi? Në mendimin tonë, jo!
Reagimi ka qenë i jashtëzakonshëm, nga artistë, studentë të Akademisë së Arteve, personazheve publikë e artdashëve në përgjithësi. E megjithatë, në disa media jo pak në zë në vendin tonë, prishja e Teatrit Kombëtar ka kaluar përmes redaksive si një lajm i zakonshëm i ditës. Por teksa qëllimi i medias është të përcjellë në mënyrë të paanshme e neutrale informacion për audiencën, situata e tanishme me raportimet për prishjen e Teatrit duket se stonon disi me faktin që po në të njëjtat media, deri dje bëhej opinion editorial edhe për një mace të ngecur në pemë. E megjithatë, një ngjarje e tillë si shkatërrimi i Teatrit Kombëtar është raportuar me të njëjtin intensitet që raportohet arrestimi i kontigjentit të lagjes sepse u kap me 5 gramë hashash, por qartazi, jo nga dëshira.
Mjafton t’i hedhësh një sy reklamave për të kuptuar se shumë prej këtyre mediave janë në pozita të tilla që nuk i mundësojnë shprehjen e qoftë edhe të trishtimit për shuarjen e një pjese të historisë së Tiranës dhe artit shqiptar, sepse një reklame e keqe për Bashkinë, mund të rezultojë në një zhdukje të reklamave të bizneseve që fije të padukshme i lidhin pikërisht me këtë institucion.
Shkurtimisht: Nëse Bashkia të sjell para, mos fol keq për Bashkinë.
