Nën “smogun” e katrahurës financiare-politike, që kanë krijuar për shkatërrimin e godinës së Teatrit Kombëtar dhe zhvatjen e truallit me eksponentë të botës së krimit; dyshja Rama-Veliaj, po fshehin dhe dështimin e rindërtimit të banesave individuale në Tiranë.
Para pak orësh, agjencia e tenderëve, ka publikuar një “Buletin të Posaçëm”, ku ka shpallur vetëm vendimin e kryebashkiakut Erjon Veliaj; që njofton, se tenderi për rindërtimin e banesave individuale, të dëmtuara nga tërmeti në territorin e Tiranës, do bëhet në datën 26 maj 2020.
Qysh prej 13 janarit 2020, ky tender është bërë 11 herë; por ka dështuar e është shtyrë në çdo 15 ditë, për shkak se Bashkia Tiranë dhe qeveria, megjithëse i kanë deklaruar fondet me VKM e Vendime të Këshillit Bashkiak (VKB); realisht nuk kanë as “1 cent” për këto banesa.
Kryeministri Rama, ka tentuar disa herë, të mashtrojë e fusë në grackë ndërtuesit; duke u kërkuar të nisin rindërtimin e banesave me milionat e tyre, si mbështetje që “babloku” të mbajë premtimin, për dorëzimin e çelësave të banesave më 31 dhjetor 2020.
Por firmat e ndërtimit, madje as oligarkët e “Surrelit” Gjoka, Fusha e Salillari, të cilët Rama i ka puthur në ballë; nuk pranojnë të punojnë me milionat e tyre, mbasi e dinë që nuk do marrin “kokërr leku”, nga qeveria me buxhet bosh e borxhe “mal” në çdo çep të planetit.
Sot më 15 maj 2020, Erjon Veliaj e ka ri-shpallur tenderin fantazmë për herë të 12-të në këto 5 muaj; me fond limit 2 miliardë, 123 milionë, 598 mijë e 655 lekë pa TVSH, ose afro 23 milionë Euro me TVSH.
Nuk e dimë nëse është lajthitje, lojë mashtruese e radhës, apo realitet; por në njoftimin e tenderit, Erjon Veliaj ka caktuar 24 muaj afat për përfundnimin e banesave (qershor 2022); ndërkohë që “babloku” është betuar se banorët, do t’i marrin celësat më 31 dhjetor 2020.
Një gjë është e vërtetë: Edhe tenderi i datës 26 maj 2020, do shtyhet përsëri si 11 herët e tjera; por atë datë, xhonglerët Rama-Veliaj, do mundohen ta maskojnë me tymnajën e 24-vjetorit të masakrës së votave “Berisha” të 26 majit 1996.
Siç veprojnë përherë, kur duan t’i shmangen të vërtetës, provave të korrupsionit, mashtrimeve, dështimeve dhe përgjegjësisë kushtetuese, para braktisjes e shkatërrimit social-ekonomik të qytetarëve./Pamfleti
