Kur menduam se debatet për Teatrin morën fund me kalimin e tij në pronësi të bashkisë, çështja po përshkallëzohet edhe më tej.
Debatet për prishjen e Teatrit Kombëtar vijojnë edhe sot pasi një grup artistësh nga Aleanca e Mbrojtjes së Teatrit Kombëtar kanë paditur në Prokurorinë e Tiranës 3 inxhinierë të Institutit të Ndërtimit, që i sugjeruan bashkisë shembjen e godinës së teatrit.
Elbarina Kola, specialiste pranë Institutit të Ndërtimit; Artur Hasantare, përgjegjës në këtë Institutit dhe Olsi Nunaj specialist, akuzohen për “shpërdorim detyre” dhe “falsifikim dokumentesh”, pasi sipas aleancës, shtetasit në fjalë nuk kanë qenë në grupin e punës që ka kryer aktin e ekspertimit të datës 23.03.2018 dhe nuk kanë bërë ekspertimin fizik të godines.
“Kemi të bëjmë me një çetë shkatërruesi që duhet të mbajë përgjegjësi. Këta po e kalojnë cakun. Unë i bëj thirrje edhe organeve të drejtësisë le të tregojnë në një kauzë si e jona që janë pro nesh. Detyra e parë e drejtësisë është të mbrojë qytetarin. Le të tregojnë që janë për qytetarin dhe me qytetarin. Ky është rasti më i pastër për të treguar se sistemi gjyqësor po ndryshon. Nuk është rast politik dhe betejë politike. Organet e drejtësisë ne duhet të na i japim këtë të drejtë”, tha aktori Neritan Liçaj.
Ne kallzimin drejtuar prokurorise se Tiranes, perfaqeusesit e Aleances per Mbrojtjen e Teatrit ngrenë dhe disa pyetje:
- Këta tre shtetas në cilësinë e ekspertëve si arritën t’i vlerësojnë kushtet aktuale të godinës së Teatrit Kombëtar kur nuk kanë bërë ekspertim fizik të godinës?
- Mbi cfarë provash shkencore e bazojnë këtë përfundim këta ekspertë?
- Këta ekspertë kanë dhënë mendim personal bazuar në përfundimet e tyre shkencore konkrete apo i janë referuar nga fillimi deri në fund një ekspertimi të kryer nga ekspertë të tjerë?
- Nëse këta shtetas i janë referuar vetëm aktit të ekspertimit të vitit 2018 atëhere cfarë kuptimi ka ekspertimi i tyre dhe mbi cfarë tagri e kane referuar aktin e ekspertimit të datës 13.05.2020?”
Ndërkohë policia e Tiranës ka gjobitur kreun e PD-së dhe një grup prej 40 personash për grumbullimin pranë Teatrit Kombëtar, përtej fashës orare të qarkullimit të lejuar në këtë periudhë pandemie.
I fortë ishte edhe reagimi i presidentit Ilir Meta nga Kavaja, ku i ka cilësuar aktet e fundit për prishjen e Teatrit nga bashkia e Tiranës si veprimtari të mirëstrukturuar kriminale që është e paaministueshme në çdo kohe.
“Teatrin e mbron kushtetuta dhe të gjitha konventat ndërkombëtare ku Shqipëria aderon që prevalojnë mbi çdo akt tjetër. Më duket një marrëzi çdo përpjekje për të prishur Teatrin pa shteruar ligjin e kushtetueses dhe hapat ligjorë të kësaj çështjeje që ka marrë një dimension ndërkombëtar. Ka reaguar edhe komisionierja e BE për kulturës që bën thirrje për dialog për mbrojtjen e këtyre vlerave. Akoma nuk mund të besoj disa akte, që disa janë denoncuar në prokurori edhe nga aleanca për Teatrin, pasi më duket një papërgjegjshmërie përtej çdo ekstreme dhe llogarie. Sepse nuk kemi të bëjmë me një shkelje të kushtetutës dhe funksionimit të kushtetutës, por edhe në një përgjegjësie penal për ata që përfshihen nga këtë prishte. Akte e fundit flasin për një veprimtari të mirëstrukturuar kriminale që është e paaministueshme në çdo kohë”.
Më 8 maj këshilli i Ministrave vendosi që godina e Teatrit Kombëtar të kalojë në pronësi të Bashkisë së Tiranës, e cila do të ketë në pronësi edhe sipërfaqen e tokës rreth tij.
Presidenti Ilir Meta i është drejtuar për herë të dytë Gjykatës Kushtetuese në lidhje me shfuqizimin e vendimit të qeverisë për kalimin e Teatrit Kombëtar në pronësi të Bashkisë së Tiranës.
