Teksa kriza ekonomike që pritet të godasë vendin ka nisur të japë efektet e para, situata për biznesin në Shqipëri nuk duket aspak pozitive.
Sipas një parashikimi të Bankës Europiane për Rindërtim dhe Zhvillim, ekonomia shqiptare pritet të ketë një ulje të Produktit të Brendshëm Bruto prej 9%, që do të ketë një ndikim afatgjatë politik dhe shoqëror.
Por teksa një rënie e përgjithshme është e pranueshme për shkak të ndikimit botëror që pandemia ka pasur, sipas sipërmarrësve shqiptarë me të cilët iconstyle.al ka qenë në komunikim të vazhdueshëm, një dëm i jashtëzakonshëm biznesit i është bërë dhe nga politikat e gabuara që janë ndjekur në vendin tonë.
Vijimi i izolimit për një kohë tejet të gjatë detyroi binzeset të mbanin dyert mbyllur duke shkaktuar edhe falimentinim e disa prej tyre (lexo këtu).
Një tjetër shqetësim i madh ka qenë dhe detyrimi për të vijuar pagesat e taksave në mënyrë të rregullt ndërkohë që aktiviteti ekonomik për biznese të shumta ishte bllokuar tërësisht.
Pagesa e TVSH-së dhe sigurimeve shoqërore janë dy prej barrave më të rënda për binzesin aktualisht, për të cilat shteti nuk ka ofruar asnjë lehtësi dhe po vijon me kërkesat për pagimin e këtyre detyrimeve njëlloj sikur të ishte një periudhë qetësie, duke injoruar faktin që për pjesën dërrmuese të bizneseve në Shqipëri, 2-mujori i fundit ka qenë një periudhë humbjesh masive.
Situata gjithashtu është bërë kritike dhe në qendrat tregtare, ku ndonëse dyqanet kanë qenë të mbyllura me urdhër të qeverisë prej 2 muajsh, atyre u janë faturuar qiratë dhe shpenzimet e përbashkëta si të mos kishte ndodhur asgjë.
E megjithatë, ndonëse biznesi përgjatë gjithë kësaj kohe është shtrydhur për t’i nxjerrë dhe pikat e fundit nga të ardhurat që mund të kenë mbetur nga koha para pandemisë, një fenomen tjetër shqetësues po del në dritë: ai i frikës për të folur.
Përveç organizatave apo shoqatave si ajo e Turizmit apo ajo e Bareve dhe Restoranteve që kanë dalë në deklarata të herë pas hershme për të negociuar kushtet që u janë vendosur, sipërmarrësit si individë i druhen në mënyrë të frikshme bërjes publike të identiteteve të tyre apo bizneseve që drejtojnë, kur u kërkohet që t’i japin zë problemeve të tyre. Dikush i druhet shtetit, dikush qendrave tregtare, dikush madje kërkon dhe të mos i përmendet emri në një telefonatë nga frika se një regjistrim i mundshëm mund t’i prishë punë. Në thelb, të gjithë i druhen një hakmarrjeje që në këto kushte mund të jetë fatale për biznesin dhe që ka krijuar një klimë frike e censure në një kohë që e ardhmja është tërësisht e pasigurt.
“Po ç’mund të them unë? Ato që mund të them më shumë mund të më dëmtojnë sesa të më ndihmojnë. Nuk i mbron njeri sipërmarrësit në këtë vend, nuk ia del dot njeri as me gjyqe as në rrugë të tjera se e dimë shumë mirë si funksionon drejtësia këtu!”-shprehet një prej sipërmarrësve, i cili mban shpresën tek negociatat e reja me qendrat tregtare për të mos paguar të plotë qiranë e dyqaneve që kanë qenë të mbyllur prej 2 muajsh.
/Iconstyle.al
