Pyetjeve të shumta lidhur me plazhin këtë sezon turistik dhe mënyrën se si do të veprohet, i ka dhënë fund drejtoresha e Agjencisë Kombëtare të Turizmit, Kornelia Ferizaj.
Sipas saj, këtë vit hapja e plazheve në të gjithë territorin shqiptar do të bëhet në fund të muajit maj.
Ferizaj sqaroi kushtet në të cilat do të zhvillohet plazhi këtë vit, që do të jenë mëse të rrepta.
Drejtoresha njoftoi se do të zbatohet distanca fizike.
Çadrat në plazh duhet të vendosen 3,5 metra larg njëra-tjetrës dhe kjo distancë do të ruhet edhe në ujë nga pushuesit.
Për të kontrolluar zbatimin e masave do të ketë vrojtues plazhi.
Gjithashtu, nuk do të ketë ushqim me vetëshërbim nëpër hotele. Ushqimi do t’i serviret pushuesve në dhomë, ndërsa një koordinator do të masë temperaturën për klientët e hotelit në mëngjes dhe në darkë.
Sektori i turizmit është ndër më të goditurit pas situatës me pandeminë e koronavirusit.
Në masat e marra kreu i qeverisë ka treguar se do të përfitojnë agjencitë turistike që bëjnë pjesë në biznesin e vogël, gjithashtu ka menduar edhe për pagat e punonjësve të restoranteve.
Por e vërteta është që shumë agjenci turistike dhe hotele, janë drejt shpalljes së falimentit. Ata e quajnë këtë vit turistik një sezon për të mbijetuar, me shpresën që të paktën të mbulojnë kostot e punës.
Pas tërmetit operatorët turistikë mund të mos i rezistojnë dot kësaj goditjeje të dytë. Një pjesë e bizneseve mund të mos jenë në gjendje të hapin dyert dhe masat e qeverisë janë pa mjaftueshme, pasi turizmi në këtë periudhë ka nevojë për më shumë vëmendje.
