Një gjyshe ka takuar për herë të parë pas dy muajsh nipin e saj këtë të diel!
Pamjet janë siguruar nga ABCNews, në Bulevardin e Ri në Tiranë, ku gjyshja e sëmurë dhe nipi i saj qëndruan 2 metra larg njëri-tjetrit duke u parë në distancë, pa pasur mundësi të përqafohen.
Ndonëse ka dy muaj që nuk e sheh nipin e saj të vogël, gjyshja tregoi se është e detyruar të durojë pa i dhënë një përqafim, dhe kjo jo nga frika për veten, por për të voglin.
“Jam gjyshja, jetojmë më vete. Ka dy muaj që s’ka dalë dhe unë e kam kërkuar që ta takoja se nuk duroja dot më. Tani mezi po i rri larg, por duhet kujdes dhe unë jam dhe e sëmurë vetë. Unë jam dhe e paralizuar dhe prapë jashtë do rrimë. Unë sot nuk e kam takuar. Se pastaj ja u sëmur pse të më ngelet mua barra”, u shpreh gjyshja.
Këtë të diel kanë pasur liri daljeje pensionistët dhe për prindërit me fëmijë deri në moshën 14 vjeç. Për pensionistët liridalja ishte deri në orën 10:00, ndërsa prindërit dhe fëmijët nën 14 vjeç do të kenë mundësi të lëvizin nga ora 11:00 paradite deri në 17:30 të pasdites.
/abcnews.al
