Disa ditë më parë, Drejtoria e Përgjithshme e Shërbimeve të Transportit Rrugor ka njoftuar në rrjetet sociale të gjithë drejtuesit e automjeteve që duke nisur data 4 maj, dita e djeshme, ka nisur aplikimi i gjobave për të gjithë ata që bëjnë ndryshim të karakteristikave të mjeteve të tyre.
Kush ndryshon ngjyrën e makinës, i vesh xhamat, i vendos impiant gazi, i shton apo i redukton numrin e sendeve makinës, i ndryshon motorrin apo kutinë e shpejtësisë, i vendos karroceri apo i heq karrocerinë, e përshtat për autoambulancë, për invalid, për studio televizive të lëvizshme etj., duhet të paraqitet më pas për të paguar paratë tek kompania Shpesa al e Lush Osmanit në Kamëz.
Punonjësit e tij, e shikojnë mjetin, të japin një letër dhe të marrin paratë dhe kush nuk paguan paratë, merr gjobë deri në 200 mijë lekë nga organet shtetërore.
Tarifat sipas këtij kocensioni variojnë nga 150 mijë lekë deri në 200 mijë lekë.
Kompania Shpresa-Al, me në krye Lush Osmanin, ka nënshkruar në datën 30 mars të këtij vitit me Bashkinë e Kamzës, tenderin me objekt blerje karburanti.
Në garë nuk ka marrë pjesë asnjë kompania tjetër, përveç Shpresa.al (me nipt K31321021N) dhe një procedurë e tillë me vetëm një konkurrent, sipas legjislacionit shqiptar është e ligjshme, por procedura të tilla janë me risk dhe janë më të ekspozura ndaj abuzimeve.
Mirëpo, kush është Lush Osmani?
Në 25 tetor të 2019, Policia e Durrësit shpalli në kërkim me urdhër të prokurorisë pronarin e kompanisë ‘Shpresa.al”, Lush Osmani, i dyshuar si organizator dhe përfitues si skemës së tjetërsimit të 68 mijë metrave katror tokë shtetërore pranë Kepit të Rodonit.
Osmani u shpall në kërkim policor si i dyshuar edhe për përfitimin e një godine në mënyrë korruptive si pjesë e një grupi të strukturuar kriminal dhe disa javë më pas, Osmani u vetëdorëzua në Policinë e Durrësit.
Fillimisht Prokuroria kërkoi izolimin e tij, por më pas, kërkoi masën “Detyrim paraqitje”, teksa kundrejt garancisë pasurore, Gjykata e Durrësit i ka dhënë masën e sigurisë “Detyrim paraqitje”.
Mirëpo, llogaritë e hapura me drejtësinë nuk e kanë penguar Osmanin të jetë i preferuari i qeverisë për tendera.
Përveç tenderit të sipërpërmendur, ndërsa ishte nën hetim nga Prokuroria e Durrësit, Osmani ka marrë një tjetër tender pa garë nga Drejtoria e Përgjithshme Nr. 1 e Punëtoreve të Qytetit Tiranë, me objekt blerje vaj, në datën 30 janar 2020.
Ndërkaq, në 5 vitet e fundit Lush Osmani ka marrë nga shteti rreth 700 tendera me vlerë 1.554.148.983 lekë tendera.
Nga pikëpamja ligjore, ligji për prokurimin publik, në nenin 45, parashikon përjashtimin e operatorëve ekonomikë nga një procedurë konkurruese vetëm kur janë dënuar me vendim të formës së prerë, për disa vepra penale, ku përfshihet edhe pjesëmarrje në grup të strukturuar kriminal, mashtrimi, korrupsioni etj.
Ndërkaq, akti special normativ i qeverisë, i miratuar disa muaj më parë shkon më tej, pasi parashikon heqjen e të drejtës për të marrë tendera edhe te personave që janë nën hetim për kryerjen e një grupi veprash penale, ku përfshihet edhe hetimi si pjesë e grupit kriminal.
Në rastin konkret, grupi i personave të arrestuar dhe të shpallur në kërkim për tjetërsimin e pronës shtetërore tek Kepi i Rodonit, ku bën pjesë edhe pronari i Shpresa.Al., sipas njoftimit të policisë akuzohen për veprat penale: “Korrupsioni pasiv i personave që ushtrojnë funksione publike”, “Shpërdorimi i detyrës”, “Falsifikimi i dokumenteve”, “Mashtrimi”, “Grupi i strukturuar kriminal, të kryer në bashkëpunim”.
“Shpresa-Al Group”
Kompania “Shpresa-Al Group” u krijua në vitin 2002 si një iniciativë private e administratorit Lush Osmani dhe brenda një kohe mjaftë të shkurtër u përhap duke zgjeruar portofolin e shërbimeve.
Kjo kompani e filloi aktivitetin e saj me ofrimin e shërbimit të transportit të udhëtarëve e të mallrave, por më pas kompani u zgjeruar në fushën e informatikës, mekanikës apo ndërtimit.
Përpos tenderave pa garë, Osmani ka marrë edhe tendera me vlera të larta, me kompani të tjera në garë, por nuk ka asnjë ndryshim mes fondit limit dhe ofertës fituese.
Por, a do merren këto çështje nën hetim nga SPAK-u apo nga platforma e re ligjore anti-KÇK , e shpallur me shumë bujë në mars nga kryeministri Rama? / Gazeta Reforma
