Kryeministri Edi Rama ka njoftuar përmes një konference për shtyp me përfaqësues të institucioneve fetare të vendit se nga 18 maji do të merren masa për hapjen graduale të kishave dhe xhamive.
Kreu i qeverisë kërkoi hartimin e një kalendari për komunitetet fetare, bazuar në eksperiencën e vendeve të tjera dhe kërkoi gadishmërinë e krerëve të besimeve fetare.
Deri në 18 maj do ketë një plan konkret masash lehtësuese, por hapja e kishave dhe xhamive nuk mund të jetë e menjëhershme, sipas Ramës.
Deklarata e kryeministrit:
“Rihapja e riteve duhet të jetë e kujdesshme dhe ta bëjmë këtë gjë në mënyrë graduale. Kjo kërkon konsultim me ju pasi praktikat tuaja janë të ndryshme jo vetëm nga komuniteti në komunitet , por edhe brenda vetë një kalendari të caktuar mujor apo javor ju keni praktika që nuk janë njësoj. Kam kërkuar që grupi i punës, që është i përbërë nga ekspertë të fushës dhe pastaj edhe Komiteti ynë i ekspertëve të adresojnë këtë çështje. Ndryshe nga aktivitete të tjera dhe të biznesit kjo duhet bërë bashkarisht.
Do ju kërkoja gatishmërinë tuaj që nga sot ose nesër të jeni të disponueshëm të vendosni kontakt nga personat për të pasur një konsultim konkret. Pra si mund të hartohet një kalendar gradual deri në normalizimin e plotë të komunitetit. Ne do të hartojmë nja kalendar të arsyeshëm duke marrë në konsideratë edhe eksperiencat e vendeve të tjera. Shpresoj që në 18 maj, kur edhe do të jetë konfiguruar me kufizimet e veta i gjithë projekti i fazës së dytë të mund të japim edhe disa indikacione konkrete për komunitetet fetare. Në fillojmë nga puna ose sot ose nesër, varet nga ju”.
