Një person është arrestuar nga Policisa e Kosovës pasi dyshohet se ka kërcënuar me jetë familjen e ish-ministrit të Jashtëm, Behgjet Pacollit.
Lajmin e ka bërë të ditur Naim Murseli, këshilltar i kryetarit të Aleancës Kosova e Re, Behgjet Pacolli, përmes një postimi në Facebook.
“Personi i arrestuar në orët e vona mbrëmë, me incialet E.H, i cili kërcënoi z. Pacolli dhe fëmijët e tij i ka kërkuar gjithashtu para. Personi ka pretenduar të jetë edhe prokuror i Kosovës. E.H ka kërkuar në internet shkollën e fëmijëve, e cila është shkollë publike, të z. Pacolli dhe ka kërcënuar atë se do t’i rrëmbejë dhe do t’i djeg ata për së gjalli. Z. Pacolli është shumë i tronditur dhe i mërzitur emocionalisht nga kërcënimet e bëra”, ka shkruar Murseli.
Sipas mediave në Kosovë, Behgjet Pacolli ka qenë shënjestër e sulmeve pas përplasjeve që ka pasur me zyrtarët e Vetëvendosjes, të cilët kanë kërcënuar me arrestim nëse del nga shtëpia për shkak të kthimit të tij nga Zvicra, pasi sipas rregullave në Kosovë secili i kthyer duhet të qëndrojë dy javë i izoluar si pasojë e pandemisë.
Pacolli e ka denoncuar këtë rast në policinë e Kosovës, e cila pastaj ka proceduar me mbledhjen e provave dhe arrestimin e personit.
Po ashtu, ai ka angazhuar avokatët e tij për të ndjekur çështjen ndaj atyre që përdorin gjuhë urrejtjeje, fyese e kërcënuese./gazetareforma
