Kryeministri rus Mikhail Mishustin ka thënë këtë të enjte se është diagnostikuar me koronavirus dhe përkohësisht është larguar nga detyra e tij për t’u rikuperuar.
Mishustin, 54 vjeç, sugjeroi që Zëvendës Kryeministri i Parë Andrei Belousov të zinte vendin si kryeministër në mungesë të tij.
Putin, i cili ishte duke dëgjuar në një video-konferencë televizive, psherëtiu kur dëgjoi lajmin dhe i dëshiroi Mishustin një shërim të shpejtë duke rënë dakord me zëvendësimin e propozuar.
Mishustin, i cili ka qenë një nga koordinatorët kryesorë të reagimit të Rusisë ndaj koronavirusit të ri, është zyrtari i parë rus që thotë publikisht se është mbartës i virusit.
Ai është bërë subjekti i mediave, pasi numri i rasteve të konfirmuara në Rusi u rrit mbi 100 mijë.
“Unë kam nevojë të izolohem dhe të ndjek udhëzimet e mjekëve. Kjo është e nevojshme për sigurinë e kolegëve të mi”, u shpreh ai.
Mishustin tha se do të qëndrojë në kontakt me anëtarët e qeverisë dhe Putin-in përmes konferencës online, pavarësisht gjendjes së tij.
“Ajo që po ndodh me ju, mund t’i ndodhë kujtdo,” u përgjigj Putin. “Kur të shkoni në spital, më telefononi. Unë do të pres telefonatën tuaj”.
Mishustin do ta kalojë periudhën e tij të izolimit në një spital nën mbikëqyrjen e mjekëve, tha zëdhënësi i tij Boris Belyakov, pa zbuluar vendndodhjen e saktë se ku do të trajtohej kryeministri.
Belyakov shtoi se të gjithë ata që kishin qenë në kontakt me Mishustin do të izolohen dhe do të testohen për virusin.
/Yahoo
