Pak ditë më parë, Ministri i Shëndetësisë, Ilir Beqaj, dha një propozim për mënyrën sesi mund të përballohet situata e Covid-19 në Shqipëri.
Sipas tij, duhet të uleshin pagat e punonjësve të administratës dhe pensionet e të moshuarve.
Propozimi i tij ka prekur shtresën e moshuar të vendit, të cilët kanë nisur në “Dosja.al” një letër të shkruar nga Kujtim Hazbiu.
Letra përmban nota ironie, teksa pensionistët sugjerojnë madje t’i ngrenë një bust ministrit me paratë e tyre që “s’kanë ku t’i çojnë”.
Letra e plotë:
“Jemi një grup pensionistësh. Na ndihmoni duke bërë publike një gëzimin tonë nga më të paimagjinueshmit për gjithë jetën tonë. Ne pensionistët kishim kohë që po mendonim ku t’i çonim lekët që na tepronin nga pensioni çdo muaj. Më thonë të drejtën s’kemi pasur besim në as një bankë. Po Zoti vonon por nuk harron ia na solli shokun Ilir Beqja si shpëtimtarin tonë. Jemi shumë të gëzuar për këtë dhuratë të madhe. Ne kishim dëgjuar për këtë shok, për heroizmat e tij në interes të qytetarëve shqiptarë kurrë nuk e kemi besuar që ky do të ishte edhe shpëtimtari ynë. Lavdi Zotit për këto vlera që kemi në parlamentin shqiptar. Nisur nga ky nder i madh që na bëri shoku Beqja ne pensionistët kemi vendosur:
1 – Ju bëjmë thirrje skulptorëve më të mirë të Shqipërisë për t’i bërë një bust në sheshin “Skënderbej”. Financimi nga pensionistët.
2 – Me 300 lekë e shtesë së pensionit t’i sponsorizojmë një udhëtim jashtë shtetit çift me charter. Marrim përsipër edhe shpenzimet e xhamave mbrojtës nëpër resorantet ku do ushqehet se larg qoftë.
3 – Grupi i pensionistëve që ka përfituar nga ndihmat për koronavirusin të sponsorizojë nga një pako makarona dhe 1/2 vaj sa për të kaluar ca kohë.
4 – Ju bëjmë thirrje të gjithë pensionistëve që kanë fituar ndonjë tender nëse duan të sponsorizojnë tek mjekët një vizitë falas për shokun Beqja se ka pak pasoja nga propozimi më i madh i shekullit që ka bërë gjithashtu të sponsorizojnë edhe ilaçet se na duket se deri tani kanë qënë të skaduara dhe largqoftë ndikojnë keq.
Nuk gjejmë fjalë për ta uruar zotin Beqaj por si vlerë e madhe që është i kemi lënë Zotin ta shpërblejë. Ndihmoje o Zot, mbylli gojët e liga për këtë ëngjëll që se zë gjumi për popullin e sidomos për ne pensonistët, ndihmoje o Zot. Kurrë mor bir nuk na shkonte mendja që do ishe kaq vlerë e madhe intelektuale, të lutemi qëndroji propozimit tënd që edhe ne të flemë rehat se mirë gjithë ai pension po 300 lekë e fundit ku t’i çojmë se larg qoftë marrin vesh kriminelët e na vrasin. Të lumtë zoti Beqaj që qanë ditë natë për ne ta shpërbleftë Zoti në familjen tënde. Ishalla zoti nuk vonon! Urime biri jonë e vazhdo mendo për ne.”
