Ka bërë jehonë denoncimi i një 17-vjeçareje nga Saranda, se një 72-vjeçar dhe 2 persona të tjerë kanë abuzuar me të, teksa deri tani shumë pak dihej rreth ngjarjes.
Ata që na kanë tërhequr vëmendjen deri tani kanë qenë prindërit e vajzës, që kanë deklaruar herë pas here se vajza po gënjen dhe se është bindur nga i dashuri i saj për të bërë denoncimin.
Por, jo vetëm kaq, pasi hije më të forta dyshimi u ngritën ditën e sotme, kur ata kanë paditur në polici të dashurin e saj, Denito Ruçi, të cilin e akuzojnë se e ka marrë me forcë vajzën e tyre dhe se ka qëllim ta trafikojë jashtë vendit, ndërsa i ati thotë se Ruçi ka qenë i akuzuar gjatë qëndrimit jashtë shtetit dhe për shkak të problemeve me ligjin i është dashur të ndërrojë edhe emrin.
Mirëpo, arsyet se përse prindërit e minorenes kanë dalë kundër saj dhe të dashurit të saj, janë tronditëse.
Babai i vajzës ka bashkëpunuar me persona të tjerë, mes të cilëve edhe 72-vjçarin, për të kryer abuzime seksuale ndaj saj, madje në shtëpinë e tij.
Denoncimi është bërë nga emisioni “Fiks Fare” që ka publikuar video dhe regjistrime të bëra nga vajza që vërtetojnë se babai jo vetëm e ka përdorur atë, por edhe e ka dhunuar.
Vetë vajza ka regjistruar ballafaqimin me babain e saj, ku e akuzon se ai e ka rrahur dhe i ka sjellë shokët tij në shtëpi që kanë abuzuar me të.
Vajza i kërkon që të nxjerrë nga shtëpia Bajram Tushën, i cili qëndron në shtëpinë e tyre deri në orët e para të mëngjesit, kur vjen Policia, teksa 72-vjeçari ka armë, madje në video dëgjohen disa të shtëna në ajër.
Babai i vajzës njoftoi Policinë sepse dyshonte se i dashuri i 17-vjeçares, Denito Ruçi, ishte shumë afër më shtëpinë dhe mund të rrëmbente vajzën.
Pasi Policia vjen në banesë, prindërit e mbyllin vajzën brenda shtëpisë dhe nuk e lejojnë atë që t’i takojë ata vetëm, teksa vajza i përgjërohet policëve që ta dëgjojnë, por ata i thonë se nëse nuk pushon do ta dërgojnë në spital dhe se djalin do ta fusin në burg.
Njëri nga policët i kërkon vajzës të dalë në dritare dhe kur polici afrohet, vajza i flet me një zë shumë të ulët, pas kësaj dëgjohet nëna e cila i ulëret duke thënë “Mos e beso, mos e beso sepse të gënjen”.
Nga ana tjetër, Bajram Tusha edhe pasi vjen policia nuk pranon të ikë në shtëpinë e tij, pasi sipas tij duhet të ruaj vajzën.
Sakaq, në momentin kur vajza ballafaqohet me të atin, ai i lutet të heq dorë dhe i premton se nuk do të sjellë asnjë nga shokët e tij në shtëpi, sidomos Bajon “Bajon s’ta sjell” i thotë ai.
Situata në këtë familje është qetësuar vetëm në orët e para të mëngjesit, kur policia i thotë vajzës që nëse ajo nuk rri urtë, atëherë atë do ta çojnë në spital dhe sipas tyre me këtë sjellje ajo do të marrë në qafë edhe djalin, të dashurin, i cili do të përfundojë në burg.
Pra, përveç prindërve, në këtë situatë edhe Policia bëhet një me abuzuesit dhe në vend që të ndihmojë vajzën bën të kundërtën.
Pas marrjes së deklaratës së djalit dhe pyetjes së vajzës nga psikologu, që në orët e para të hetimit Prokuroria nxorri urdhër arresti për Bajram Tushën, i cili gjatë marrjes në pyetje ka deklaruar se ka kryer marrëdhënie me vajzën, por kjo nuk ka qenë kundër dëshirës së saj.
Pas këtyre ngjarjeve, brenda pak orësh Njësia e Mbrojtjes së Fëmijëve në bashkëpunim me Prokurorinë nxorrën një urdhër mbrojtje për vajzën. /gazetareforma
