Presidenti i Republikës, Ilir Meta ka deklaruar se mbështet nismën e qeverisë për ndryshime në Kodin Penal.
Ky kod parashikon dënime me burg për të gjithë ata qytetarë, veprimet e të cilëve ndikojnë në përhapjen e koronavirusit.
Kreu i Shtetit u shpreh se ndryshimet ishin të detyrueshme, pasi kishte boshllëk ligjor. Ai shtoi se qeveria ka marrë parasysh të gjitha propozimet e bëra nga Presidenti, Avokati i Popullit dhe shoqëria civile.
“Ju përgjigja kërkesës së Kuvendit për ndryshimet në Kodin Penal. Nisur nga zhvillimet, nga gjendja e fatkeqësisë, por mbi të gjitha për shkak të boshllëkut ligjor që ka Kodi Penal, sa I takon veprimve që kryhen me dashje, Presidenti vlerëson se inciativa e Kuvendit dhe qeverisë, që mbrojtja e shëndetit të gaerantohet edhe nga norma penale, duhet mbështetur. Presidenti konstaton se mes draftit të prezantuar fillimisht nga deputetët dhe përmbajtjes finale ka shumë ndryshime thelbësore positive, që kanë reflektuar një pjesë të sugjerimeve të shoqërisë civile, avokatit të popullit, Presidentit”, tha Meta.
Lexoni më poshtë pjesë nga deklarata:
Si Presidenti i Republikës, në mbështetje të nenit 84 dhe 93 të Kushtetutës, kam dekretuar shpalljen e ligjit nr. 35/2020 “Për disa shtesa dhe ndryshime në ligjin nr. 7895, datë 27.1.1995, ‘Kodi Penal i Republikës së Shqipërisë’, të ndryshuar”, të miratuar nga Kuvendi i Shqipërisë.
Shpallja e ligjit u vlerësua e nevojshme në situatën pandemike që po kalon vendi ynë, për arsye se kohëzgjatja, pasojat, apo mundësia e ripërsëritjes së një situate të tillë, mbeten ende të paparashikueshme. Kam ndjekur nga afër shqetësimet e bëra publike nga aktorë të ndryshëm mbi propozimin dhe miratimin e ndryshimeve në Kodin Penal.
Shmangia e procedurave të përshpejtuara në miratimin e ligjeve që kërkojnë shumicë të cilësuar, nuk është një kërkesë vetëm formale kushtetuese, që duhet të respektohet nga komisionet e përhershme parlamentare dhe seanca plenare. Përkundrazi, është një kërkesë kushtetuese që në thelb kërkon kryerjen e ndryshimeve në ligje të rëndësishme, me një konsultim dhe konsensus të gjerë.
/Iconstyle.al
