Presidenti i Republikës së Kosovës, Hashim Thaçi, është shtruar në spital.
Pas shqetësimeve të shfaqura në gurët në veshka, sot kreu i shtetit ka shkuar për një kontroll në Emergjencën e QKUK-së dhe më pas është shtruar në Klinikën e Urologjisë, ku po trajtohet nga personeli mjekësor.
Lajmin e ka bërë të ditur zyra e Presidentit përmes një njoftimi për media.
“Presidenti i Republikës së Kosovës shpreh mirënjohje për kujdesin e treguar nga i tërë personeli shëndetësor i Qendrës Klinike Universitare të Kosovës. Gjendja shëndetësore e Presidentit të Republikës së Kosovës është stabile dhe Zyra e Presidentit të Republikës së Kosovës do t’iu mbajë të informuar lidhur me trajtimin që është duke marrë presidenti Thaçi”, thuhet në njoftim.
Mësohet se Thaçi u është nënshtruar analizave mjekësore nga stafi i Urologjisë, aty ku është duke qëndruar për momentin.
Lajmi vjen në një kohë që në Kosovë ka pasur një shpërthim të rasteve me COVID-19, ku vetëm në 24 orë, dje kishte 51 të infektuar.
/Telegrafi/
