Këtë të hënë në Shqipëri pritet të nisë testimi serologjik, për grupet më të riskuara ndaj COVID-19, siç është stafi mjekësor në spitalet COVID 1 dhe 2.
Vetë mjeku infeksionist Pëllumb Pipero njoftoi dje se ky testim do të nisë javën që vjen, për të mësuar më shumë rreth situatës qarkulluese të virusit.
“Sapo më erdhi një njoftim që të hënën fillon analiza serologjike me personelin e QSUT dhe besoj edhe me personelin e COVID 2, për të parë ekspozimin dhe nivelin e mbrojtjes dhe për të ditur më shumë rreth situtës qarkulluese të virusit. Është një lajm shumë i mirë që duhet përshëndetur”, tha Pipero duke deklaruar që ky është një vendim i Ministrisë së Shëndetësisë.
Por çfarë është testimi serologjik?
Testimi serologjik për SARS-CoV-2 përcakton në mënyrë të saktë rastet me COVID-19, përfshirë ato që mund të jenë asimptomatike ose të rikuperuara.
Ato janë teste me bazë gjaku që mund të përdoren për të identifikuar nëse njerëzit kanë qenë të ekspozuar ndaj një patogjeni të veçantë, duke parë përgjigjen e tyre imune.
Në të kundërt, testet RT-PCR që aktualisht përdoren globalisht për të diagnostikuar rastet e COVID-19 mund të tregojnë vetëm praninë e materialit viral gjatë infeksionit dhe nuk të tregojnë nëse një person ishte infektuar dhe shëruar më pas.
Testet e reja mund të japin detaje më të mëdha në përhapjen e një sëmundjeje në një popullatë, duke identifikuar individë që kanë zhvilluar antitrupa ndaj virusit.
“Besoj se në një javë analiza mund të merren të dhëna të rëndësishme për të marrë vendime sesi do të vazhdojë më pas”, u shpreh Pipero.
Nuk dihet nëse ky testim do të bëhet për popullatën në një masë më të gjerë, por nevojën e testimeve e kanë theksuar shumë shtete, në mënyrë që të arrihet të parandalohet përhapja e koronavirusit.
“Iconstyle.al” gjithashtu ka theksuar prej kohësh nevojën e testeve masive, pasi kjo taktikë ka dhënë frytet e veta në një frenim të konsiderueshëm të përhapjes së COVID-19 në shumë vende (lexo këtu).
/Iconstyle.al
