Kryeministri Edi Rama ka bërë me dije se do të shpërblehet ai që ka punuar në të zezë, por nëse gjen kurajën të flasë me emra.
Në një dalje live për t’iu përgjigjur pyetjeve të qytetarëve, kreu i qeverisë tha se qeveria ka menduar edhe shpërblimin për të gjithë ata punonjës që kanë punuar në të zezë, pra që punëdhënësit nuk i kanë deklaruar.
Por kjo do të përfitohet vetëm nëse ata do të kenë kurajën të denoncojnë kompaninë ku kanë punuar në të zezë.
“Do t’u japim një shpërblim financiar dhe do marrim përsipër ta ndjekim punën deri në fund që pronari t’i regjistrojë dhe do kërkojmë nga pronari të jenë në mbështetje të kësaj nisme, përndryshe do të duhet të përballet me ligjin. Nuk mund ta bëj dot nëse këtu vetëm ankoheni, ‘isha në të zezë, po ne nuk jemi, ne ju duhemi për vota’. Asnjë shtet nuk e bën këtë se është e pabëshme, më thoni si e ndajmë ne atë që vjen dhe thotë të vërtetën dhe atë që gënjen dhe të na dalin këtu sikur të gjithë janë rropatur në të zezë, ndërkohë që e vërteta është që një pjesë ka jetuar me lekët e prindërve duke pirë kafe”, tha Rama.
“Brenda 24 orëve do kemi këtë ofertë për ata që punojnë në të zezë dhe më pas marrim përsipër ta ndjekim të drejtën e tyre deri në fund, që pronarët të bëjnë detyrën e tyre”, theksoi kreu i qeverisë.
Ndërkohë, kryeministri shtoi se nuk do të shtyhen pagesat e sigurimeve shoqërore.
“Ti do t’i paguash sigurimet shoqërore të të gjithë atyre që ke në punë”, iu përgjigj Rama një personi që ka biznes.
“Do të marrësh para nëse denoncon kush t’i ka dhënë paratë në të zezë”, e mbylli fjalën kryeministri.
/Iconstyle.al
