Kryeministri i Irlandës, Leo Varadkar do të punojë një ditë në javë si mjek për të ndihmuar bluzat e bardha në luftën kundër pandemisë së koronavirusit.
Kreu i qeverisë është i pari udhëheqës në botë që ka ofruar shërbimet e tij për Ekzekutivin e Shërbimit Shëndetësor (HSE) në fusha që janë në kompetencën e tij, tha të dielën një zëdhënës për zyrën e tij.
“Dr Varadkar u rendit në regjistrin mjekësor muajin e kaluar. Ai i ka ofruar shërbimet e tij për një seancë në javë në fushën e tij të ekspertizës”.
“Shumë nga familja dhe miqtë e tij po punojnë në shërbimin shëndetësor. Ai donte të ndihmonte edhe vetë në një mënyrë të vogël”.
Varadkar, 41 vjeç, punoi si mjek i ri në Dublin dhe u kualifikua si mjek lokal në vitin 2010 para se të linte mjekësinë për t’u bërë një politikan me kohë të plotë, dhe më vonë Kryeministër.
Irish Times raporton se kryeministri do të bënte vlerësime në telefon të pacientëve, në përputhje me protokollin për të këshilluar njerëzit që mund të infektohen, dhe jo vizita personale.
Mijëra infermierë, mjekë, studentë të mjekësisë dhe të tjerë i janë përgjigjur thirrjes për t’iu bashkuar luftës kundër COVID-19 në Irlandë, madje edhe shumë pensionistë.
158 njerëz kanë humbur jetën në Irlandë ku shënohen 5000 të infektuar dhe 25 të shëruar.
/The Guardian
