Të paktën nëntë anëtarë të komunitetit shqiptar në Amerikë kanë humbur jetën për shkak të koronavirusit.
Lajmin e trishtë e ka bërë të ditur ambasada shqiptare në Shtetet e Bashkuara. Përmes një deklarate në rrjetet sociale thuhet se tre prej viktimave janë nga Shqipëria, katër nga Maqedonia e Veriut dhe dy nga Mali i Zi.
“Të paktën nëntë anëtarë të komuniteti shqiptarë kanë humbur jetën, tre nga Shqipëria, katër nga Maqedonia e Veriut dhe dy nga Mali i Zi. Ambasadorja gjen rastin të shprehë ngushëllimet për familjet dhe të afërmit e viktimave”.
Në deklaratë thuhet gjithashtu se të paktën 30 anëtarë të tjerë nga komuniteti shqiptar janë infektuar. Një pjesë e tyre po e kalon nga shtëpia, ndërsa të tjerë janë shtruar në spital.
“Mbi tridhjetë anëtarë nga komuniteti ynë janë evidentuar në faza të ndryshme të sëmundjes. Me disa prej tyre është komunikuar drejtpërdrejtë në telefon, të cilët kanë informuar se simptomat e sëmundjes janë të rënda, por fatmirësisht të kalueshme në kushte shtëpie. Bazuar në informacione, individët trajtohen në spital vetëm kur janë në gjendje tepër kritike dhe kanë probleme me frymëmarrjen dhe kërkohet mbështetja e tyre me respiratorë”, thuhet në deklaratë.
Komuniteti shqiptaro-amerikan u ka ardhur në ndihmë të të moshuarve të cilët nuk mund të dalin dot nga shtëpia. Situata më shqetësuese mbetet në Nju Jork dhe Nju Xhersi, pasi ka shumë shqiptarë që kanë humbur vendin e punës për shkak të krizës nga koronavirusi.
/Iconstyle.al
