30 mjekë e infermierë shqiptarë u nisën drejt Italisë për të ndihmuar vendin fqinj për të mposhtur epideminë Covid-19.
Ata do të paguhen nga Shqipëria, ndërsa nisma e tyre është duartrokitur nga populli shqiptar e italian.
Njëra prej mjekeve të grupit, Alma Neco, tregoi në një lidhje me Skype për emisionin “Shqipëria live” eksperiencën e saj në Itali.
Ajo u shpreh se nuk kishte frikë dhe mezi po priste të niste punën, pasi e ndiente si detyrim ndaj shtetit Italian.
Për më tepër, ajo kishte lindur në Itali dhe kishte jetuar atje për disa kohë, ndaj misioni i saj merrte më shumë kuptim.
“Të gjithë kemi një lidhje me Italinë. Unë në Itali kam lindur dhe jam rritur dhe e ndjeja si një detyrim. Rreziku ekziston por ne e kemi marrë përsipër rrezikun që në momentin që kemi marrë përsipër këtë profesion. Edhe në Shqipëri kishte rrezik, kështu që nuk ndryshon ndonjë gjë në këtë aspekt. Prindërit më kanë mbështëtur maksimalisht. Më kanë caktuar në Brescia, në spitalin me më të prekurit në Lombardi dhe me më të infektuarit në Itali. Përsëri kjo nuk është ndonjë ndryshim, pasi ne anastezistët jemi mësuar me vrull. Madje mezi po pres që të fillojmë”, u shpreh Alma Neco.
